Frakshon di Partido Nashonal di Pueblo (PNP) a manda un petishon urgente pa Parlamento di Kòrsou, pa yama un reunion di Komishon Sentral mas pronto posibel pa trata e tema di e kapasidat turístiko di nos pais. Frakshon di PNP ta preokupá kon e kresementu eksplosivo i aselerá di turismo aktualmente ta tumando lugá a kosto di e Yu di Kòrsou.
Kòrsou ta nos orguyo, nos kas, i nos herensia. PNP ta brasa desaroyo ekonómiko i ta yama bon biní na nos bishitantenan, pero e realidat aktual ta alarmante. E ekspanshon desproporshonal aki ta pone un preshon inmenso riba nos infrastruktura manera awa, koriente i kareteranan, ta pusha e yu di tera afó di e merkado di bibienda, i ta menasá e outentisidat i e naturalesa ku ta e alma di nos pais.
E sektor turístiko mes, pa medio di CHATA, resientemente a bati alarma bogando pa un reorientashon stratégiko i un turismo di balor haltu i impakto abou. “Ora e sektor mes ta pidi pa hala un rosea i wak bon kiko nos ta hasiendo, Parlamento no por sinta brasa krusá,” e Frakshon ta enfatisá.
Pa garantisá ku e desaroyo di nos pais ta pone e Yu di Kòrsou i nos herensia na promé lugá, PNP ke debatí riba e siguiente puntonan durante e reunion di Komishon Sentral:
· Destination Carrying Capacity Study: un análisis riba e límite máksimo di bishitante i kamber ku Kòrsou por karga.
· Tourism Masterplan 2027-2032: kon esaki lo garantisá protekshon di nos kultura, infrastruktura i e kalidat di bida di nos hendenan.
· Planifikashon Urbano (EOP): maneho di pèrmit pa mega-proyektonan ku ta blòkia nos kosta pa lokalnan i ta afektá nos naturalesa i monumentonan.
· Ekonomia Lokal: medidanan pa sigurá ku e sèn di turismo ta keda lora lokal i ta duna un bida digno na e trahadó i empresario chikitu i mediano.
Frakshon di PNP a pidi pa invitá representantenan di Curaçao Tourist Board (CTB), Curaçao Hospitality and Tourism Association (CHATA), i Fundashon CARMABI pa duna nan ekspertisio durante e reunion.
Petishon pa reunion Urgente komishon sentral tokante kapasidad turistiko di nos pais