Mientras cu e debate riba e refinanciamento di debe y e cooperacion cu Hulanda ta continua, un advertencia serio a wordo lansa tocante e consecuencia di acepta un “Rijkswet” (Ley di Reino). E argumento principal ta cu un ley di e caliber aki ta superior na nos leynan local, manera un Landsverordening (por ehempel, e LAft actual), locual por mara man di nos representantenan den Parlamento pa hopi tempo, si no ta pa semper.
E Superioridad di Rijkswet y e Rol di Hulanda
Segun declaracionnan den conferencia di prensa ta wordo splica cu un bes cu Aruba drenta den un Rijkswet, nos no por sali for di dje mas sin e aprobacion di Hulanda, Aunke tin exsit bepaling, e ta un caminda sin salida . E punto di mas critico ta cu e decision final riba e leynan aki ta cay den man di e di (Tweede Kamer) na Hulanda.
Esaki ta habri un cuestionamento democratico profundo unda cu e Pais ta bay atras enbes di bay dilanti : Hulanda ta kita e poder di e ciudadano nan di e Pais sin un motibo valido, paso Aruba ta cumpliendo cu si finansas.
- E politiconan na Hulanda ta esnan cu ta vota riba e leynan aki.
- E pueblo di Aruba no a vota pa e politiconan ey, ni nan no tin un representacion directo den e Tweede Kamer.
- Consecuentemente, Aruba ta keda obliga na acepta locual Den Haag dicidi, sin hopi espacio pa protesta.
Tur esaki ta loke cu Gobierno di AVP –FUTURO na cabes Minister Mike Eman , Geoffrey Wever y Gerlien Croes ta creando pa Pais Aruba, un semi bachi mane Boneiro BES eiland.
E Imposibilidad pa Haci Cambio Localmente
Un di e preocupacionnan mas grandi comparti ta cu, si den futuro un parlamentario di Aruba kier propone un cambio den un Rijkswet od cualkier desicion na Aruba, Parlamento di Aruba mes no tin e poder ey mas pa haci cambio ey su so, si e Rijkswet pasa, pero si Tweede Kamer kier haci e cambio mane ta Aruba su deseo, si Hulanda no ta na agrado e no lo wordo cambia, kico y con nos ta yama e modus operandus aki ? Husto? Dictador riba un Pais cu Hulanda no sa kico ta come y bebe di e Pais? , colonialismo ? sclavitud moderno ?
- Segun e Statuut di Reino Hulandes (Articulo 15 pa 18), Aruba tin e derecho di duna informacion y propone un “voorstel” (proposicion) na e Tweede Kamer. Awo mester cana e caminda aki debi na e mal echo di loke cu Gobienro di AVP –FUTURO a haci tras di lomba di Parlamento di Aruba.
- Sinembargo, e decision final pa amenda of cambia e ley ta keda exclusivamente na Den Haag.
Esaki ta nifica cu parlamentarionan local, kende pueblo a eligi pa representa nan, ta keda practicamente sin poder real riba e leynan di Reino aki. Awo e pregunta di oro ta “ parlamento sin poder tin e derecho di existencia ?
Si Parlamento tin derecho di existencia solamente pa gasto, esta paga salario y pa ta popchinan di marioneta di Hulanda, dicon e pueblo di Aruba mester tin e necesidad pa vota pa un parlamentario ?