Un dia di famia perfecto pa experencia nos storia, nos historia y nos cultura.
Desde december 2025 Entidat Publico Boneiro ta trahando riba e Canon di Boneiro. E Canon ta un linea di tempo moderno di Boneiro, cu ta presenta sucesonan, personanan, sitionan, edificionan, musica, baile y storianan importante. E proyecto di Canon di Boneiro ta forma parti di e Agenda di Accion Pasado di Sclavitud y e departamento di Comunidad y Cuido ta ehecuta e proyecto aki.
Durante e ultimo periodo, e departamento di Planificacion y Desaroyo a encarga su mes cu e restauracion di e bakinan di awa. Nan a traha riba e mehoracion di e accesibilidad di Fontein y e posibilidad pa cana den e plantashi aki. Nos ta invita e habitantenan di Boneiro pa nan mes bin experencia esaki dia 17 di mei. Riba e dia aki, pa prome biaha nos ta celebra Dia di Canon na Boneiro y nos ta habri porta di Fontein pa grandi y chikito pa e dia special aki.
Durante e evento oficial di apertura di Canon di Boneiro dia 17 di mei, lo tuma luga diferente recorido na Fontein, caminda lo conta e historia rico di e area aki. Parti mainta, FuHiKuBo ta organisa e recoridonan aki. Bishitantenan lo siña tocante e prome habitantenan, nan por mira e pinturanan den baranca y nan lo tende tocante e rebelion y lantamento durante e periodo di sclavitud. Tambe nan lo haya conocemento tocante e storianan tras di e bakinan di awa, siña mas tocante Segundo Guera Mundial y hopi mas. Banda di esaki, lo tin un lunch familiar conhunto. Durante un sesion interactivo y diferente taller parti merdia, bo por yuda pensa y scohe cua ta e topiconan cu mester bin den e Canon di Boneiro.
Den e programacion di Dia di Canon dia 17 di mei, tin espacio ainda parti merdia pa comunidad propone actividad. Pensa por ehempel riba un taller di Spoken Word, un taller di Kuranderia of un taller di pintamento. Bo tin un bon idea pa un actividad riba Dia di Canon? Manda bo idea pa mas tardi dialuna 27 di april na daudi.cijntje@bonairegov.com.
Especialmente pa Dia di Canon di Boneiro, Entidat Publico Boneiro tin bus disponibel cu ta core bay Fontein, debi na e espacio limita pa staciona auto na Fontein. Pa e motibo aki, cordialmente nos ta suplica publico pa haci uzo di e servicio special di bus aki.
Entidat Publico Boneiro lo tene publico na altura di tur desaroyo tocante e prome Dia di Canon di Boneiro. Pronto lo sigui mas informacion tocante con publico por registra pa esaki y tocante e servicio special di bus pa bay Fontein dia 17 di mei.