Minister Plenipotenciario Dra. Gracita Arrindell a participa na e recepcion di Dia di Independencia di Estados Unidos, organiza pa Mision di Estados Unidos na Hulanda, na Museo Louwman den Den Haag.
E celebracion di e aña aki tabata tin un significado special, pasobra e tabata marca Freedom 250, e 250 aniversario di e firma di e Declaracion di Independencia di Estados Unidos.
Bou di e tema Freedom 250, e recepcion a celebra no solamente un momento importante den historia di Estados Unidos, sino tambe mas cu dos siglo di amistad entre Estados Unidos y Hulanda.
Diplomaticonan, representante di gobierno y otro invitadonan a reuni pa un anochi dedica na reflexiona riba e balornan comparti di libertad, democracia y cooperacion internacional cu ta sigui forma e relacion entre ambos pais.
E programa oficial a inclui palabranan di Embahador di Estados Unidos Joseph Popolo y Minister Presidente di Hulanda Rob Jetten, sigui pa presentacion di bandera, himnonan nacional y un presentacion musical di banda rock Hulandes-Americano Kensington.
Minister Arrindell a felicita Embahador Popolo y pueblo di Estados Unidos cu e fecha historico aki, declarando:
“Na nomber di Gabinete, mi ta extende felicitacionnan caluroso na Estados Unidos di America cu su 250 Dia di Independencia.
E aniversario aki no ta solamente un celebracion di historia Americano, sino tambe di e balornan duradero di libertad, democracia y amistad cu ta sigui conecta nacionnan henter mundo.”