Minister di Salud Publico, Desaroyo Social y Labor (VSA), Richinel Brug, a tuma nota di e cantidad creciente di raportahenan y discusionnan cu ta circula riba medionan social tocante suputo dadonan di abuso di labor y trato inhusto di trahadonan na Sint Maarten.
E Minister a declara cu, maske medionan social a bira un plataforma importante pa personanan comparti nan preocupacion- y experencianan, ta igualmente importante pa kehonan formal tocante abuso di labor, despido inhusto, condicionnan di trabao insigur, salarionan sin paga, intimidacion, of otro violacionnan relaciona cu labor, wordo raporta oficialmente via e canalnan adecuado den Ministerio di VSA.
Minister Brug a recorda tanto e doñonan di trabao como e empleadonan cu cada uno tin derecho- y responsabilidadnan bou di e leynan di labor di Sint Maarten, y a enfatisa e importancia di mantene relacionnan di trabao cu ta di rispet, legal y profesional.
“Empleadonan merece di traha den ambientenan sigur y husto, miertras cu doñonan di trabao tambe merece empleadonan profesional y responsabel cu ta rispeta e reglanan y proceduranan di e lugar di trabao. E relacion entre doñonan di trabao y empleadonan mester ta basa riba rispet mutuo, husticia y cumplimento cu e leynan di Sint Maarten,” Minister Brug a declara.
Pesey, e Minister ta curasha e empleadonan cu ta kere cu nan ta victima di abuso di labor of violacionnan relaciona cu labor, pa raporta e asuntonan aki oficialmente na e departamentonan corespondiente den Ministerio di VSA. Esaki ta inclui e Departamento di Labor, e Division di Asuntonan Social y Laboral na e Government Administration Building, y Inspeccion di Labor na W.G. Buncamper Road #33, Vineyard Office Park, pa asina e investigacion- y intervencionnan adecuado por tuma lugar caminda ta necesario.
Minister Brug a enfatisa tambe cu raportamento formal ta importante pa garantisa cu e kehonan ta wordo debidamente documenta, evalua y trata conforme e leynan y proceduranan aplicabel.
Ministerio di VSA ta permanece compromete pa proteha e derechonan di trahadonan, fomenta practicanan di labor husto, y garantisa condicionnan di trabao saludabel y legal den henter Sint Maarten.