Oficina di Maneho di Desaster (ODM) ta urgi mayoristanan di cuminda, operadornan di deposito y doñonan di negocio rond di e pais pa duna garantia cu nan facilidadnan ta prepara pa horcan pa e Temporada di Horcan di Atlantico 2026, ya cu un solo horcan ta suficiente pa haci e temporada uno malo.
Awor cu e temporada di horcan a cuminsa y cu ta spera un aumento den actividad di storm den e proximo lunanan, ODM ta enfatisa cu e miho momento pa prepara ta prome cu un storm menasa e pais.
Coordinador Nacional di Desaster y Jefe di Bombero, Clive Richardson, ta pidi e operadornan y doñonan di deposito, centro di distribucion y facilidad di almasenahe pa revisa y activa medidanan di preparacion hopi prome cu cualkier sistema di tempo aserca.
“Un parti clave di preparacion pa horcan ta pa compronde e peligronan cu por afecta bo negocio y tuma e pasonan necesario pa reduci riesgo prome cu un storm yega,” Richardson a declara. “Cada negocio, incluyendo negocionan nobo cu recientemente a habri nan porta, mester tin plan di contingencia cla pa sigura nan operacionnan, proteha empleadonan y minimisa daño potencial na propiedad y na e comunidadnan bisiña.”
ODM ta recorda doñonan di negocio, y esnan recien estableci, cu materialnan solta cu comunmente ta wordo hiba rond di deposito y facilidadnan di almasenahe por bira proyectilnan peligroso durante biento fuerte. Articulonan manera plachinan di plywood, paletnan di transportacion (shipping pallets), paletnan di cuminda, bannan di metal (strapping) y otro materialnan cu no ta fia, por lanta den aire facilmente y causa daño significante na edificionan, vehiculonan y propiedadnan bisiña.
Pesei ta anima e operadornan di negocio pa conduci inspeccion di nan facilidadnan y areanan rond di dje, y pa desaroya plannan cu ta permiti pa kita of sigura materialnan rapidamente ora cu tin un pronostico di menasa di storm tropical of horcan pa Sint Maarten.
Mester haci tur esfuerso pa mantene e areanan di almasenahe padofo y e rond di e depositonan liber di sushi solta y materialnan sin mara cu por forma un menasa durante condicionnan di tempo extremo. Doñonan di propiedad mester percura pa tur medida di preparacion pa horcan por wordo implementa den un corto periodo di tempo si ta necesario.
ODM ta anima tambe tanto Hogarnan como negocionan pa revisa nan plannan di preparacion pa horcan y identifica cualkier debilidad cu mester wordo atendi mietras cu tin suficiente tempo ainda pa prepara. E pico di Temporada di Horcan di Atlantico normalmente ta cuminsa medio augustus y ta sigui te cu october.
“E obhetivo principal ta e proteccion di bida prome cu tur cos, sigui pa proteccion di propiedad y e comunidadnan residencial den cercania,” Richardson a enfatisa.
ODM ta recorda tur negocio cu ora emiti un Vigilancia di Storm Tropical of Vigilancia di Horcan — normalmente 48 ora prome cu e impacto spera di un sistema di tempo — e plannan di continuidad di negocio y di preparacion pa horcan mester wordo activa inmediatamente. Accion na tempo durante e periodo aki por reduci riesgonan significativamente y mehora e resiliencia.
Oficina di Maneho di Desaster lo sigui duna informacion di preparacion durante henter e temporada di horcan y ta anima tur sector di comunidad pa permanece vigilante, informa y prepara.
Ta urgi comunidad pa siña mas tocante e peligronan di horcan y e recursonan cu bo tin mester riba con pa prepara bo famia, hogar of negocio pa un impacto di storm/horcan via e website di Gobierno: www.sintmaartengov.org/hurricane unda bo por download bo “Hurricane Season Readiness Guide’ y “Hurricane Tracking Chart.” E informacion aki ta balioso tambe pa residentenan nobo.
Scucha e emisora di radio di Gobierno SXMGOV – 107.9FM – pa informacion y noticianan oficial prome, durante y despues di un horcan. Bo por sigui tambe noticianan y informacion relaciona cu tempo, como mientra e discursonan nacional di Promé Minister, presidente di e Centro di Operacion di Emergencia (EOC), bishitando e pagina di Facebook @SXMGOV.
Pa informacion oficial relaciona cu tempo, check e website di e Departamento Meteorologico di St. Maarten (MDS): www.meteosxm.com of bishita nan pagina di medio social Facebook.com/sxmweather/.