Accion nacional pa haci Aruba limpi
Gobierno di Aruba lo organisa e gran accion nacional pa haci Aruba limpi riba Dia pa Cuida Aruba. Prome Minister Mike Eman ta invita tur ciudadano, empresa, organisacion, club deportivo, NGO y centro di bario pa uni forsa y contribui na un Aruba mas limpi, bunita y saludabel. E iniciativa a wordo anuncia durante e “Accion di Bario” na Mabon, caminda Prome Minister Eman, hunto cu diferente servicio y organisacion, a cana den bario pa atende necesidadnan di e comunidad y ehecuta trabou di limpiesa. Entre e instancianan presente tabatin, entre otro, Serlimar, City Inspector, DOW, GKMBS, Departamento di Asuntonan Social, Ministerio di Turismo, Transporte y Labor como tambe diferente otro departamento gubernamental. Parlamentario Otami Thomasia, Sonali Fernandez Acosta, representantenan di Comision di Desaroyo y Bienestar di Mabon y señor Gerco Rijkers, Presidente di Werkgeversvereniging Arubaanse Bouwnijverheid (WAB), tambe a participa na e actividad.
Sector priva tambe ta asumi responsabilidad
Werkgeversvereniging Arubaanse Bouwnijverheid (WAB), e asociacion cu ta representa dunado di trabou den sector di construccion na Aruba, a confirma su sosten na e iniciativa Señor Gerco Rijkers, Gerente general di Algemeen Bouwbedrijf ALBO Aruba N.V. y Presidente di WAB, a indica cu WAB ta sostene e iniciativa y cu e asociacion lo brinda su aporte na Mabon. El a invita otro companianan pa inscribi y contribui cu nan personal y recursonan den otro bario of area di Aruba durante e dia nacional di limpiesa. Prome Minister Eman a gradici señor Rijkers y WAB pa nan compromiso. El a enfatica cu participacion di sector priva ta manda un señal importante: e reto di mantene Aruba limpi ta un responsabilidad comparti entre Gobierno, comercio y comunidad.
Un isla limpi ta importante pa pueblo y turismo
Parlamentario Otami Thomas a señala cu limpieza di Aruba ta esencial tanto pa bienestar di e comunidad como pa imagen di nos isla como destinacion turistico. Basura den barionan y areanan publico no solamente ta afecta calidad di bida, sino tambe naturaleza y e impresion cu bishitantenan ta haya di Aruba.
Señora Sonali Acosta, na representacion di Ministerio di Turismo, a felicita e iniciativa y a invita tur hende pa participa, sea limpi dilanti di cas, adopta un area of organisa un accion den nan propio bario.
Henter Aruba por participa
Durante e accion di 25 di juli, cada organisacion, empresa of grupo di ciudadano por scoge un sitio specifico pa limpia. Esaki por ta por ehempel:
un bario of caya;
rond di cas of negoshi;
cercania di un centro di bario;
rond di un club deportivo;
un playa of otro area publico.
Prome Minister Eman a haci un yamada na henter comunidad pa trece famia, colega y miembro di organisacion hunto, scoge un luga y pone man na obra. “Aruba ta di nos tur. Si cada ciudadano, empresa y organisacion adopta un area y contribui, hunto nos por haci Aruba completamente limpi y, mas importante ainda, mantene limpi,” Prome Minister Eman a expresa. Gobierno di Aruba ta invita henter pueblo pa reserva diasabra 25 di juli 2026 y participa activamente den “Haci Aruba Limpi”. Scoge bo caya. Scoge bo bario. Scoge bo area. Pone man na obra. Hunto nos ta tene nos dushi Aruba limpi.
