Mientras e Departamento Meteorologico di Sint Maarten (MDS) ta manda un advertencia di un riesgo halto di calor excesivo for di juli te cu september 2026 , e Ministerio di Vivienda Publico, Ordenamento Territorial, Medio Ambiente e Infrastructura (VROMI) ta encurasha habitantenan pa tuma e precaucionnan necesario durante periodonan di calor extremo.
Segun e Departamento Meteorologico, ta spera temperaturanan mas halto cu normal, anochinan mas calor y un chens mas grandi di ola di calor den e lunanan benidero. E condicionnan aki por aumenta e riesgo di malesanan relaciona cu calor y pone presion adicional riba salud publico, recursonan di awa, demanda di energia, infrastructura y e medio ambiente natural di e isla.
Un manera cu habitantenan por prepara miho ta dor di explora e St. Martin Climate Impact Atlas , un plataforma online gratis e interactivo cu ta yuda usuarionan compronde con riesgo climatico manera calor extremo, inundacion, subida di nivel di lama, erosion di costa y secura por afecta diferente comunidad. E Atlas ta combina data di temperatura cu informacion social y demografico pa identifica cua comunidad por enfrenta riesgonan mas grandi.
Minister Gumbs ta invita e publico pa explora e plataforma aki pa tuma decisionnan mas informa pa nan cas, negoshi, scol of comunidad. Bo por accesa e atlas dor di scanea e codigo QR den e comunicado of bishitando: https://stmartin.climateimpactatlas.com.
