Fire Chief y Coordinador Nacional di Desaster (NDC) of e Oficina di Maneho di Desaster (ODM), Clive Richardson, ta haci un yamada na habitantenan y e comunidad di negocio pa keda vigilante y monitoria e raportnan local di tempo di e Departamento Meteorologico di Sint Maarten (MDS): www.meteosxm.com of bishita nan pagina di red social Facebook.com/sxmweather/ en conexion cu e temporada di horcan di Atlantico 2026.
E ultimo pronostico di dia 10 di juni di e Departamento di Ciencia Atmosferico di Colorado State University (CSU) ta anticipa un temporada bou di lo normal cu 11 storm cu nomber, di cual cinco (5) por bira horcan y, for di esakinan, dos (2) por bira horcan mayor cu velocidad di biento di mas di 111 milla pa ora.
Sin importa si ta un temporada activo of bou di lo normal, ta importante ainda pa tuma tur preparacion necesario. ODM ta pidi comunidad pa verifica dobel nan baki di faha/surtido di emergencia (disaster supply kit), locual mester ta cla for di inicio di e temporada di horcan.
E baki di faha di emergencia mester tin por lo menos shete dia di cuminda y awa. Si bo no a arma esaki ainda, e momento pa haci’e ta awor! No spera te na e ultimo momento pa bo ta cla pa un storm/horcan.
E nombernan di storm pa 2026 ta: Arthur, Bertha, Cristobal, Dolly, Edouard, Fay, Gonzalo, Hanna, Isaias, Josephine, Kyle, Leah, Marco, Nana, Omar, Paulette, Rene, Sally, Teddy, Vicky, y Wilfred.
Ta urgi comunidad pa siña mas tocante e peligronan di horcan y e recursonan cu bo tin mester riba con pa prepara bo famia, hogar, of negocio pa e impacto di un storm/horcan door di bishita e website di Gobierno: www.sintmaartengov.org/hurricane, caminda bo por download bo “Guia di Preparacion pa Temporada di Horcan” y e “Plat di Tracking di Horcan”. E informacion aki ta valioso tambe pa habitantenan nobo.
Habitantenan, bishitantenan y doñonan/operadornan di negocio mester sa e diferencia entre un watch (alerta) y un warning (aviso).
Un Tropical Storm Watch (Alerta di Storm Tropical) ta wordo emiti ora cu condicionnan di storm tropical cu bientonan sostení di 39 pa 73 milla pa ora ta posible den un area specifico dentro di 48 ora.
Un Tropical Storm Warning (Aviso di Storm Tropical) ta nifica cu por spera condicionnan di storm tropical dentro di 36 ora. Un storm tropical no tin mester di yega e forsa di un horcan pa e ta mortal.
Un Hurricane Watch (Alerta di Horcan) ta nifica cu condicionnan di horcan ta posible dentro di e area di alerta, cu bientonan cu forsa di storm tropical cuminsando dentro di 48 ora.
Un Hurricane Warning (Aviso di Horcan) ta nifica cu ta spera condicionnan di horcan na un luga dentro di e area di aviso, cu bientonan cu forsa di storm tropical cuminsando dentro di 36 ora.
Scucha e stacion di Radio di Gobierno – SXMGOV 107.9FM – pa informacion y noticianan oficial prome, durante y despues di un horcan. Bo por sigui tambe e noticianan y informacionnan relaciona cu tempo, mescos cu e discursonan nacional di e Prome Minister, presidente di e Centro di Operacion di Emergencia (EOC), door di bay na e pagina di Facebook @SXMGOV.
Pa informacion oficial relaciona cu tempo, fia riba pronosticonan cu por wordo haya riba e website di e Departamento Meteorologico di Sint Maarten (MDS): www.meteosxm.com of bishita nan pagina di red social Facebook.com/sxmweather/.
Corda, ta tuma un solo horcan pa haci’e un malo temporada. Keda vigilante y prepara! E temporada di horcan ta corré te cu 30 di november.