Un ola di preocupacion y critica fuerte a lanta den comunidad relaciona cu e direccion cu e pais ta hibando den asuntonan di autonomia. E decisionnan cu kier wordo impone na e momentonan aki den Parlamento, specialmente rond di e aprobacion di e leynan di Reino manera HOFA y LWHO, no por keda unicamente na decision di e parlamentarionan y e gobierno actual di AVP-FUTURO, considerando e peso di e decision aki riba e futuro di e pais.
No ta un secreto cu e maneho di e coalicion di AVP-FUTURO a pone Aruba na un crusada peligroso, caminda e pais ta core riesgo di perde su caracter y su propio autonomia dentro di Reino Hulandes. Mirando e desaroyonan reciente, hopi ta esnan den comunidad cu ta cuestiona formalmente e postura di e mandatario y parlamentarionan, specificamente cuestionando si e lidernan di e aliansa aki ta actuando contra e interesnan di nos antepasadonan, adoptando un postura entreguista cu por haci un daño enorme na e pais.
E situacion aki a hiba na un descontento structural caminda hopi ta categorisa e forma di goberna aki como uno basa riba rabia y interesnan partidista structural. Inconsistencia den e discurso di Dialogo Nacional. E punto di discordia mas grandi na e momentonan aki ta e aparente inconsistencia den e discurso politico tocante un Dialogo Nacional.
Den un principio, ora cu e asina yama “gremionan” (asociacionnan comercial y profesional) no tabata involucra, e lidernan aki tabata boga fuertemente pa un dialogo habrí y structural dentro di comunidad. Den varios ocasion a scucha cuestionamento riba e discusionnan real cu ta tumando luga, caminda ta lanta e duda si berdaderamente tin un dialogo nacional structural cu e pueblo, of si e dialogo ta puramente interno y cu Hulanda.
Sinembargo, awor cu e gremionan a wordo scucha y a expresa nan mes conscientemente, e discurso a cambia radicalmente. Diripiente, e exigencia pa un dialogo nacional a wordo baha for di mesa, argumentando cu e discusion mester tuma luga unicamente den Parlamento. Awor cu e gremionan a wordo scucha den e “marketing tour” di Minister Geoffrey Wever y di Prome Minister Mike Eman na Hulanda, e mandatarionan ta pretende cu tur cos ta cla, lagando e deseo cu pueblo mes un banda.
Esaki ta lanta e pregunta structural: Di con e dialogo a stop di ta importante? Acaso e pueblo a vota pa e lidernan aki entrega e autonomia di Aruba na Hulanda? E curason di e preocupacion den e comunidad ta cu Parlamento, como e organo di decision final, no mester wordo uza pa impone decisionnan di tal magnitud sin un consenshi debido di e pueblo.
Un yamada na cada ciudadano pa acerca nan politico cu nan a vota pe y vocifera bo decision sea kier keda doño di bo propio cas of ta entrega bo cas na Hulanda pa e dicidi con bo por y mag biba den bo cas , segun nan dicidi den Tweede kamer.
Pa aprobacion di leynan cu ta mara e futuro financiero y structural di Aruba den man di un “tercera parti” (Hulanda), mester tin un ruta cla di consulta popular.
Tin dos punto fundamental:
Falta di consulta: Un liderazgo real mester encamina un ruta caminda ta scucha y convence e pueblo prome cu yega Parlamento cu decisionnan di e envergadura aki.
Perdida di Libertad: Aproba e leynan aki den nan forma actual ta wordo bisto como un entrega directo di autonomia y un menasa contra e libertad di Aruba pa autodeterminá su propio futuro.
E situacion aki ta sigui genera hopi tension den e esfera politico y social. E exigencia di e comunidad ta keda un: transparencia total y pa e pueblo no wordo pusha un banda den decisionnan cu lo defini e rumbo di e pais pa e proximo decadanan.
Awo e pregunta di oro ta , Pueblo abo a vota pa e politico nan di AVP-FUTURO , entrega bo libertad y colonisa Aruba bek ?