Kaso di relisting di Bonaire a yega na un fase krusial di gran momentum internashonal, ya ku resientemente un grupo di paisnan a invulkra estadonan miembro den tur kontinente i regionan pa yuda move dilanti e kaso di Bonaire na Nashonan Uni.
E siman aki ta marka 1,100 dia di lucha den eksterior sostené dor di James Finies i Davika Bissessar Shaw di Bonaire Human Rights Organization (BHRO) for di 2022, trahando sin kansa den komunidat internashonal pa lanta konsenshi, informá stakeholders, i traha pa gana sosten pa kaso di Bonaire den Asamblea General di Nashonan Uni. Durante e periodo aki, BHRO a logra varios rekonosimentu importante, entre otro, inkluyendo bira Miembro Asosia di CARICOM Komishon di Reparashon, haña akreditashon na Nashonan Uni, i wordu honra ku e Medaya di Mérito “Gustavo Carvajal Moreno, Mensahero di Paz”
E momento aki ta spesialmente signifikante, ya ku desaroyonan aktual tantu na nivel di Nashonan Uni komo global a krea kondishonan faborabel pa kaso di Bonaire avansá. Lucha I trabou di BHRO a marka logronan importante den arena internashonal i a kontribuí na diskushonan mas amplio ku a reflehá den importante desaroyonan mundial, inkluyendo e adopshon di 5 dezember 2025 di e resolushon di Nashonan Uni ku ta establesé e Dia Internashonal Kontra Kolonialismo den Tur Su Formanan I Manifestashonan, ku lo wordu observá kada aña riba 14 di Desèmber.
Mas resientemente, BHRO a partisipá komo observadó den tur e reunionan di negoshashon ku Estadonan Miembro di Nashonan Uni den e proseso di e inisiativa di grupo di Paisnan Afrikano bou liderato di Ghana, ku a kulminá den e adopshon históriko di e resolushon I ku ta deklará: Trafikashon di Afrikanonan esklavisá i e sistema di esklavisashon rasialisá di Afrikanonan komo e krimen mas grave kontra humanidat.
Un breakthrough grandi a wordu logra den último parti di 2025, ora James Finies I Davika Bissessar Shaw di BHRO a biaha bai Geneva i a intervení durante e Séptimo Revishón Periódiko di Reino Hulandes dilanti di e Komité di Nashonan Uni pa Derechonan Ekonómiko, Sosial i Kultural (CESCR). Durante e seshon aki, BHRO a entregá informashon i a defende kaso di derechonan humano na Bonaire. Pa promé biaha, temanan ku ta afektá Bonaire a wordu lanta direktamente pa sosiedat sivil di Bonaire presente na Geneva den un evaluashon di derechonan humano di Hulanda, kaminda ekspertonan a kuestiona e delegashon Hulandes tokante derechonan sosial, kultural i ekonómiko di Boneiru.
E proseso di evaluashon a resaltá preokupashonnan serio relashoná ku diskriminashon, desigualdat, derechonan di idioma nativo, protekshon sosial, i e kondishonan sosio-ekonómiko I kultural mas amplio ku ta afektá Bonerianonan nativo—enfatisando e nesesidat urgente pa protehá e derechonan, dignidat, kultura i desaroyo di pueblo indígena, lokal di Bonaire.
E resultadonan aki ta reflehá añanan di sakrifisio, trabou duro i lucha internashonal di James Finies I BHRO. Awe, BHRO ta hasi un yamada na tur hende—hóbennan i adultonan, for di tur sektornan i nivel di sosiedat —pa uni pa un kambio positivo.
Nos ta hasi un yamada na tur hende ku ta kere den kambio pa uni ku nos i bira parti di e kambio. Un Solo Bonaire. Un Solo Kousa. Un Solo Futuro
Huntu nos ta mas fuerte. Huntu nos por logra mas. Pa Bonaire. Pa nos futuro.