Centro di Bario Brazil, conoci como e centro amigo di tur famia rond di Aruba, ta bisti di fiesta e diabierna aki, 3 di juli. Despues di simannan di gran emocion, biba y competencia fiero, e campeonato di Mens Erger Je Niet Live 2026 lo conoce su flamante campeon.
E campeonato exitoso aki, cu a ranca sali dia 25 di april ultimo cu un cifra record di 64 grupo participante, a sa di capta atencion di grandi y chikito, hibando e wega tradicional di mesa na un nivel completamente nobo y bibo. Cu un toke di humor, e organizadornan ta titula e titulo maximo aki como un “Campeonato Mundial”, realisando cu ta na Aruba so un evento asina unico, caminda un wega di mesa ta cobra bida den e forma aki, ta wordo organisa pa henter comunidad.
E gran final: Categoria B y e Invictionan
E programa pa diabierna anochi ta priminti di ta uno yen di adrenalina y tension. Pa 8:00 pm anochi, e accion lo cuminsa cu e final den Categoria B, caminda cuater grupo lo bataya pa e titulo:
Setar Pevesa
Dushi Yiu
Screngerenge
Heavy Yiu
Immediatamente despues di e partido aki, lo drenta den e wega mas spera di e temporada: e gran final pa determina e Campeon Mundial di MEJN 2026. Den e bataya final aki, e cuater gruponan cu a sa di mantene nan mes invicto durante henter e campeonato lo enfrenta otro cara a cara:
P.V. Sinta Riba Dje
Who’s Next
Leysner & De Cuba
Hunga Malo Pasa Bon
Gratitud na e comunidad y boluntarionan
E organizacion kier a probecha e oportunidad aki pa extende un danki inmenso na tur e 64 gruponan —componi pa famianan, coleganan di trabou, bisiñanan y amigonan— cu a participa y a duna bida, alegria y un ambiente sano na e campeonato aki di 2026.
Alabes, un reconocemento special y un danki di curason ta bay pa e grupo di boluntarionan dedica di Centro di Bario Brazil. Danki na nan esfuerzo, sacrificio y labor incansabel cada fin di siman, e evento masivo aki por a resulta un exito rotundo.
E invitacion ta keda habri pa henter e pueblo di Aruba pa asisti, apoya nan favorito, y goza di un anochi familiar yena di sano entretenimento e diabierna aki for di 8:00 pm na Centro di Bario Brazil. Ta cua grupo lo lanta e trofeo maximo? Nos lo sa esaki masha pronto!
