Den un analisis critico tocante e posicion financiero y e autonomia di Pais Aruba, Parlamentario Dangui Oduber a trese dilanti argumentonan fuerte contra e imposicion di un rijkswet financiero. Basando su mes riba declaracionnan di e lider di fraccion di partido POR na Corsou, sr. Quincy Girigori, Oduber ta enfatisa cu e consecuencianan pa Corsou bou di un maneho similar tabata desastroso.
Segun e parlamentarioDangui Oduber , e realidad na Corsou caminda nan ta biba bou di un rijkswet financiero desde 2010 ta nifica cu tur decision presupuestario ta wordo tuma na Den Haag pa politiconan Hulandes cu no conoce e realidad local. E situacion aki ta pone cu cualkier iniciativa of situacion cu ta pasa na Corsou mester pasa door di un proceso di pregunta y contesta na Tweede Kamer, loke segun Oduber ta un berguensa pa un pais autonomo.
Oduber ta cuestiona e contradiccionnan cu ta bini di parti di algun politico na Aruba. Di un banda, figura manera sr. Mike Eman, Geoffrey Wever y Gerlien Croes ta argumenta cu e rijkswet ta positivo pasobra e ta trece mas control. Di otro banda, menasa y loke ta wordo vocifera loke minister Geoffrey Wever ta priminti cu e mesun ley lo trece mas libertad pa tuma decision. Pa Oduber, e pregunta ta keda: ta kico e ta realmente, mas control of mas libertad?
E parlamentario ta subraya cu e argumento di “mas control” ta un manipulacion pa malinforma pueblo. Aruba ta bou di supervision financiero caba desde aña 2014 bou di e Ley Landsverordening Aruba financieel toezicht (LAft), unda expertonan Hulandes ta forma parti di e comision pa supervisa presupuesto, gastonan y inversionnan.
Un di e puntonan mas fuerte treci dilanti ta cu e situacion financiero di Aruba ta mustra resultado solido sin mester di un rijkswet. Oduber ta indica cu den e presupuesto di 2025, 2026 y 2027, Aruba ta alcansa un surplus di 700 miyon florin riba su propio forsa y ta tuma su propio decisionnan.
Ademas, comparando e datonan macroeconómico, e debt-to-GDP (deuda nacional en comparacion cu e Producto Interior Bruto) di Aruba ta mas abou cu esun di Corsou. Esaki ta demostra cu maske Corsou tin un rijkswet financiero desde 2010 y Aruba no, e maneho y e situacion financiero di Aruba ta actualmente mas miho.
Pa conclui, Oduber ta haci un yamada critico pa reflexiona riba e balor di nos autonomia, cuestionando pakico mester entrega libertad y bende autonomia pa un “sakito di placa” mientras cu e pais ta demostrando capacidad financiero propio.
Gobienro di AVP –FUTURO ta demostrando cu nan o tin Aruba na pechi , mirando ya caba e mes modelo di Rijkswet na Corsou tin un imacto negativo y Aruba por preveni esaki , pero tog kier hinca Aruba den e formula di Rijkswet. Berdaderamente e politiconan di AVP –FUTURO kier un miho futuro pa Aruba?