Durante e ultimo tempo tin hopi discusion den nos comunidad tocante proteccion di naturalesa, e Ruimtelijk Ontwikkelingsplan met Voorschriften (ROPV) y e futuro di e uzo di UTV y ATV na Aruba. E discusion aki ta fundamental, pasobra nos naturalesa ta un patrimonio colectivo cu nos tin e deber di proteha. Sinembargo, e situacion actual ta lanta un pregunta crucial: Aruba ta aplicando un politica structural y coherente pa conserva su naturalesa, of nos ta simplemente mirando un maneho selectivo, basa riba preferencia y conveniencia politico?
Importancia di ROPV
Mientras e reglanan vigente ta keda na vigor, Gobierno tin e obligacion constitucional di garantisa nan cumplimento. No por ta asina cu ta aplica ROPV estrictamente den algun caso, mientras den otro casonan y areanan tin violacionnan evidente cu ta keda sin consecuencia.
E realidad ta cu te ainda nos ta mira continuacion di dumpnan ilegal den areanan cu e ROPV ta proteha specificamente, unda cierto actividadnan cu por afecta e balor di e area no ta permiti, pero toch ta sigui sosode cu conocemento di e autoridadnan. Na otro luganan nos ta observa cobamento y ontginning sin control cu ta causando daño irecuperabel na nos suela y paisahe. E ministernan encarga ta na altura di e situacionnan aki, pero e handhaving ta keda insuficiente y, den hopi caso, practicamente ausente.
Si naturalesa realmente ta un prioridad, esaki no por depende di cua grupo, actividad of parti di Aruba nos ta papia. Ta deber di e ministernan encarga pa actua di berdad y garantisa e cumplimento di ley.
Contraste Grandi
Tin un contraste remarcabel entre e medida drastico tuma na costa noord di Aruba, unda durante añanan e uzo di UTV y ATV a forma parti integral di nos actividad turistico y recreativo, pero di un dia pa otro a limita nan acceso door di cera e area di golpi den nomber di proteccion ambiental. Mientrastanto cu den otro areanan, actividadnan cu ta causa daño directo na suela, paisahe y medio ambiente ta sigui sosode sin cu Gobierno ta interveni cu e mesun firmesa.
Esaki ta manda un mensahe ekiboca na pueblo: cu mantencion di ley no ta uniforme, sino cu e ta wordo aplica pa conveniencia of di acuerdo cu ken ta involucra.
Proteccion di naturalesa no mester bira un conflicto entre medio ambiente, comunidad y economia. E reto ta pa crea balansa. Actividadnan economico por y mester wordo permiti, pero bou di condicionnan estricto: cu rutanan cla defini, supervision continuo y sancionnan fiho contra abuso. Sinembargo, e mesun principio aki mester conta pa tur sector y pa tur luga.
Conclusion: Menos palabra, mas accion
Aruba no por tin un politica ambiental creibel si ley ta wordo aplica solamente ora ta conveniente y contra esnan cu ta facil di para. Si ta pidi sacrificio di tour operators den nomber di naturalesa, Gobierno tambe mester demostra e mesun firmesa contra dump ilegal, cobamento sin permiso y contaminacion cu ta sosodiendo cu conocemento di e autoridadnan mes.
Un ley cu ta wordo aplica selectivamente no ta proteccion di naturalesa. Ta un herment politico.