Ultimo tempo Arkeologia Bou Awa ta hopi mas den bista y interes di publico na Aruba. Sinembargo, nos isla ya tin un trayectoria di mas cu 20 aña di dedicacion na nos Herencia Cultural Bou Awa. Museo Arqueologico Nacional Aruba (MANA) a hunga un rol crucial den e trayectoria aki. Investigacionnan haci pa arkeologo y Hefe di Departamento di Coleccion y Investigacion di MANA, drs. Raymundo Dijkhoff, a duna un inventario di reservanan arkeologico bou lama di pasado y pa futuro. Esaki a forma e base pa diferente colaboracion nacional y internacional, cual ultimamente a resulta den e colaboracion entre MANA y e compania filantropico internacional Inkfish LLC cu actualmente ta hacienda sondeo cu multi-beam di fondo di lama den e awanan teritorial di Aruba.
Pero hopi tempo prome cu a yega asina leu, e “desk-based research” (uzando tur fuente existente pa un registro di sitionan maritimo) di 2021 di drs. Raymundo Dijkhoff ya a crea otro oportunidadnan importante pa Aruba na unda MANA a haya colaboracion di Ministerio di Onderwijs, Cultuur en Wetenschap (OCW) y Rijksdienst Cultureel Erfgoed (RCE) di Hulanda. Esaki tabata tin como efecto cu a haya un colaboracion estrecho cu RCE cu ya ta bayendo pa mas cu 5 aña caba.
Na 2021 a establece un ‘Dutch Caribbean Maritime Heritage Workgroup’ (pa crea concienticacion, capacitacion, ‘network’ y colaboracion) despues cu e islanan CAS (Corsou, Aruba y Sint Maarten) na 2019 formalmente a pidi Ministerio di Cultura di Hulanda pa ratifica e Tratado di UNESCO 2001 pa Proteccion di Herencia Cultural Bou Awa. Den e grupo di expertonan riba e herencia cultural aki, drs. Dijkhoff di MANA ta representa Aruba. Na 2021 el a participa na un curso virtual intensivo di Arkeologia Bou Awa di UNESCO, y el a ser invita pa duna un lectura durante e seminario internacional “Overview of Underwater Cultural Heritage Management in Latin America and the Caribbean”.
Un di e resultadonan di e collaboracion cu OCW y RCE ta e produccion di un video den tres idioma, pues Papiamento, Hulandes, y Ingles, subsidia pa RCE, cu ta informa publico tocante e importancia di e Convenio di UNESCO 2001 pa e proteccion di Herencia Cultural Bou Awa. Por mira e video aki via un link riba e website di www.manaruba.org y e pagina di Facebook National Archaeological Museum Aruba, Instagram Museo Arkeologico y riba Youtube https://www.youtube.com/watch?v=iIKTm7ZGrEc.
E colaboracon cu RCE a culmina na 2025 den un training teoretico y practico di 3 siman di Maneho di Herencia Cultural Bou Awa cu a tuma luga na Aruba. RCE a pidi MANA como su partner organisatorio y logistico. Un total di 16 Profesional di e islanan caribense den Reino Hulandes riba tereno di Herencia Cultural Bou Awa a participa na e curso hopi intensivo aki, lidera pa profesor dr. Martijn Manders di Universidad Leiden. Di Aruba arkeologonan drs. Raymundo Dijkhoff y drs. Harold Kelly di MANA, ranger maritimo Shane Thielman di Aruba Conservation Foundation y ecologo Oriana Wouters Msc. a participa.
E meta di e training di RCE tabata pa capacita un minimo cantidad di profesionalnan riba tereno di patrimonio maritimo na e islanan den Reino Hulandes, crea un red di cooperacion y duna habilidadnan cu ta directamente aplicabel n’e islanan. Esaki tambe den preparacion pa ratification di e Tratado di UNESCO (2001) pa Proteccion di Herencia Cultural Bou Awa. E ratificacion di e tratado mester tuma luga pa asina por implementa un miho maneho y proteccion di nos patrimonio cultural bou awa.
Alabes RCE ta dunando sosten financiero pa proyectonan fundamental di maneho di patrimonio maritimo na Aruba, di cual algun ya a cuminsa na 2026 den colaboracion di MANA cu entre otro Aruba Conservation Foundation (ACF) y IDNOVA. Un grupo di sambuyadonan local y cargadonan di herencia den comunidad, bou guia di Anthony Hagedoorn y Lui Samanez, a uni pa yuda na diferente di e sitionan di investigacion.
Mientrastanto na december 2025, dr. Matt Carter di Inkfish a tuma contacto cu MANA riba recomendacion di profesor dr. Manders di RCE y actualmente ta lidera e sondeo di fondo di lama rond di Aruba, uzando e “desk-based research” como base pa localisa e ubicacion exacto y documentacion primario di sitionan nautico (barconan) describi y identifica den e investigacion conduci na 2021 cual continuamente a y ta ser amplia cu informacion nobo. E datonan di Inkfish ta sumamente importante den e desaroyo di Arkeologia Maritimo di Aruba, ya cu ta e prome “base-line research” di sitionan nautico bou awa (tin mas tipo di sitio bou awa), cu lo ta instrumental pa establece un maneho mas structura di e patrimonio cultural importante aki di nos isla.
