Mientrastanto cu e debatenan riba e situacion financiero di Hospital Horacio Oduber (HOH) ta continua, e origen di e recortenan den e sector di salud publico ta keda estrechamente liga na e condicionnan imponi pa Hulanda durante e crisis di COVID-19.
E origen di e recortenan: Landspakket y e exigencianan di Hulanda
Pa por a ricibi e ayudo financiero (likidez) di Hulanda durante e pandemia di COVID-19, Gobierno di Aruba mester a acepta un serie di condicionnan estricto hancra den e Landspakket. Un di e puntonan mas impactante tabata e exigencia pa corta di manera drastico den e gastonan di cuido medico den e sector di salud publico incluyendo e reduccion di e presupuesto di AZV y e recortamento den e tarifanan y fondonan operacional di e institucionnan di salud.
Recientemente a keda confirma cu e condicionnan aki y e marco di reforma mester a wordo prolonga pa dos aña mas, manteniendo e presion financiero riba e sector di salud na Aruba.
E impacto structural den e hospital
Vario politico ta señala e consecuencianan cu e cortamento y congelacion di e presupuestonan aki ta teniendo den practica. Den e caso di HOH, e directiva mes a señala cu pa mas di 10 aña e bedragnan a keda manteni riba e mesun nivel, locual cu e subida di e costo di bida y e efectonan di e recortenan COVID, ta haci cu aworaki tin dificultad grandi pa cubri e cuentanan diario y haci e inversionnan necesario.
Reto entre obligacion financiero y calidad di cuido
Hulanda no a worry riba e retonan cu Aruba tabatin , pero a focus solamente pa proteha riba e placa cu a ser fia pa nan haya esaki bek corectamente for di Aruba.Mientrastanto cu e obligacion di cumpli cu e Landspakket y e acuerdonan cu Hulanda ta keda vigente pa e proximo dos añanan, e reto principal pa e pais ta keda con pa balansa e exigencianan financiero aki sin compromete e calidad di e servicio medico ni e stabilidad di e institucionnan di salud na Aruba.