Awe mainta Hues di Corte di Husticia a dicta sentencia den e caso penal cu Ministerio Publico a cuminsa contra Zuriel Celaire (23), kende ta wordo acusa di complice di maltrato severo, posecion di armanan di candela y menaza di dos persona.
Por a compronde cu Hues a haya Zuriel culpabel y a condena Zuriel na castigo di prison combina, cana cu banchi electronico na enkel, keda cas obligatorio anochi y mester sigui instruccionnan di Reclasering.
Hues su conclusion riba e acusacionnan contra Zuriel ta cu e homber D.L. y e homber A. a declara cu Zuriel a palabra pa nan topa na EPB San Nicolas pa un deal di droga. Den e auto di Zuriel tabatin un persona mas cu a maltrata D.L. cu un arma di candela. D.L. a logra scapa y a grita A. pa yuda. E homber arma den e auto, a saca arma pa A. A. a core bay. Hues a mustra cu na September 2025 e rumannan L. a tira riba Zuriel y e rumannan L. ta sera den KIA.
HUES NO TA KERE ZURIEL
Hues a bisa cu e no tin motibo pa duda den declaracion di e rumannan L. Ademas tin declaracion di otro testigonan. Hues a bisa cu e no ta kere Zuriel cu D.L. y A. a set up contra dje. Hues a bisa Zuriel, cu D.L. a wordo condena a base di declaracion di A. tambe. Hues no ta kere cu ta un set up manera Zuriel ta pretende. Hues ta haya cu Zuriel tambe a menaza e ruman muher di L. y un otro persona.
CULPABEL DI MALTRATO
Hues a bisa cu e no ta hayua Zuriel culpable di intento di maltrato severo pasobra no a keda proba maltrato severo. Hues a bisa cu e ta haya Zuriel culpabel di maltrato cu un arma. Hues a bisa cu Zuriel ta responsabel cu e homber den e auto di Zuriel a maltrata D.L.
CULPABEL DI POSECION DI ARMA
Hues a mustra cu tin hopi potret di arma y Zuriel cu arma pisa den su cellular. Hues a bisa cu Zuriel a declara cu el a traha potret di dje cu arma den man via AI ( Inteligencia Artificial). Hues a sigui bisa cu no por bisa si e armanan ta real. El a mustra cu segun ley, cosnan cu ta parce un arma cu por usa pa spanta hende, ta wordo considera como arma. Esey ta haci cu lo tin un diferencia den e castigo si ta arma real of no. Hues ta haya Zuriel culpabel di posecion di arma.
Pa cu e castigo, Hues a bisa cu Fiscal a exigi 4 aña di prison y condicional TBS y cu condicionnan poni pa Reclasering y tratamento di psycologo y banchi di enkel. Hues a mustra cu abogadonan di Zuriel ta haya cu e condicionnan en especial keda anochi cas y cu banchi di enkel, ta mucho pisa.
Hues a mustra cu posecion di arma ta un problema hopi serio na Aruba. E acusacionnan contra Zuriel ta serio y ta causa sentimento di inseguridad den comunidad.
CABA BIN FOR DI HULANDA Y ATROBE PROBLEMA
Hues a bisa cu e ta tene cuenta cu e pasado di Zuriel. El a mustra cu apenas algun luna liber for di TBS na Hulanda, Zuriel ta bin causa problema na Aruba. Hues a bisa cu evaluando raportnan di pasando, e no por usa nan pa determina awor si mester impone TBS condicional. Pesey Hues a rechaza e idea di TBS condicional.
CONDICIONNAN SEVERO
Hues ta haya, teniendo cuenta cu e pasado di Zuriel, e recomendacionnan di Reclasering ta al caso, esta banchi electronico di enkel, mester keda anochi na cas, mester sigui indicacionnan di Reclasering y tratamento di psycologo.
MESTER PAGA DAÑO
Pa loke ta e demanda di daño di 7 mil florin exigi pa e dama L., kende a keda spanta, Hues a bisa cu e ta honra 1 mil florin y cu medida di pago. Esey ta nifica cu Zuriel mester paga 1 mil florin.
CASTIGO
Hues a condena Zuriel na 4 aña di prison di cual 2 aña ta condicional cu un tempo di prueba di 3 aña. Hues a bisa cu Zuriel, durante 3 aña mester cumpli cu e condicionnan stipula pa Reclasering, entre otro cu entre 6’or di atardi y 6’or di mainta, Zuriel mester ta na cas y no ta permiti pa sali riba caya. Tambe cu Zuriel ta haya un banchi electronico di enkel cu e mester keda cun’e bisti henter dia pa un periodo di prueba di 9 luna. Tambe ta asina cu Zuriel lo mester haya tratamento di psycologo.