BonaireInternacional

Akuerdo di EKADK firmá ku skol amplio papa cornes

Akuerdo Di Ekadk Firma Ku Skol Amplio Papa Cornes

Den kuadro ku realisashon di reglamentu di Edukashon Kultural Artistiko di Kalidat (EKADK), djaluna 15 di mei último e fundashon enkargá ku e proyekto aki, Art Culture Education Foundation (ACE Foundation) i Skol Amplio Papa Cornes a firma un kuerdo. Ku esaki Skol Amplio Papa Cornes ta bira e promé, pero sigur lo e último skol básiko riba Boneiru ku lo hasi esaki. Durante ultimo simannan direktor di ACE Foundation sr. Segni Bernardina a bishitá direktiva di diferente skol pa presentá e posibilidatnan i benefisionan di reglamentu aki.

Skolnan básiko ku ke hasi uso di e reglamentu aki ta haña sosten di sr. Bernardina i su grupo di guia ku konseho, treinen i medionan finansiero pa integrá e diferente aktividatnan kultural den kuríkulo di e skolnan. Ku esaki di un forma struktural nan por trese e muchanan den kontakto ku diferente disiplina di arte.

E balor grandi ku esaki tin ta ku nan ta desaroyá kreatividat, abilidatnan sosial i koperativo. Tambe nan ta siña abilidatnan importante di siglo 21 den kombinashon ku suidadania. Ku esei indirektamente nan ta desaroyá abilidatnan kognitivo ku mas i mas ta wòrdu rekonosé den skolnan. Direktor di Skol Amplio Papa Cornes sra. Ilviena Leito Carolina no solamente a firma e akuerdo sino tambe ku yen di entusiasmo ela apuntá dos kordinadó interno di kultura (interne cultuurcoordinatoren/ICC-ers). E ICC-ers nan aki lo tuma i mantené kontakto entre e skol i provedornan di arte i kultura.

Riba petishon di skol nan lo aserka e proverdornan di arte i kultura i tambe yuda nan ekipo pa riba un base konkreto hinka esaki den e programa eskolar. E provedornan di kultura aki lo por wòrdu haña den e asina yamá “Mapa Kultural”: un website kaminda tur provedornan di kultura por inskribí nan mes.

EKADK ta bai amplia riba e proyekto aki buskando aliadonan i provedornan kultural artístiko ku lo por karga vishon ku tin tras di EKADK, ku lo sòru pa konektá mas skol ku arte i kultura. Asina e muchanan di Skol Amplio Papa Cornes lo haña lèsnan di entre otro artistanan ku lo inspirá nan pa diskubrí i desaroyá nan propio talentonan. Un vishon bunita ku tur involukrá ta kompartí. Sr. Bernardina ta spera ku pronto por firma e akuerdo di kolaborashon ku mas skol, “pa por fortifiká e muchanan for di chikitu den nan desaroyo artístiko i konosementu kultural”. Durante klòusura di Siman di Mucha, ACE Foundation a entrega un award na yufrouw Ilviena Leito Carolina di Skol Amplio Papa Cornes como e prime skol pa firma e akuerda aki.

Related posts

Korsou Lo ehekutá un Kampaña grandi di Firma kontra COHO

EA News Author

Na Boneiru ta muchu tempran ainda pa papia di un berdadero bahada di kasonan di kontagio

EA News Author

ACE Foundation ta anunsia su ultimo show pa aña 2023: Art of Freedom

EA News Author

1 comment

Akuerdo di EKADK firmá ku skol amplio papa cornes - Notisia 365 June 1, 2023 at 9:06 pm

[…] Source link […]

Reply

Leave a Comment

Whatsapp Message