Aruba Aquatics Federation (AAF) a marca un presencia fuerte durante e recien finalisa Campeonato di Carifta 2026, caminda e seleccion nacional di Aruba a competi contra e miho talentonan di 17 pais y isla di Caribe. Cu un delegacion di 19 atleta, nos isla a bolbe demostra pakico landamento ta un referencia deportivo di alto nivel pa Aruba.
Pa mas di dos decada, Aruba a mantene un tradicion di excelencia den e evento internacional aki. E edicion di e aña aki no tabata e excepcion, enfrentando un calidad di competencia sumamente halto, mesun pool caminda den pasado a sali medayistanan Olimpico y campeonnan mundial hubenil.
Rendimento pa categoria
E seleccion, bou direccion tecnico di Ismael Santiesteban y Jordi Grote, tabata dividi den tres categoria principal:
- 11-12 aña: E base di nos deporte a wordo representa pa 5 mucha muher y un mucha homber. Nan a destaca pa nan gran progreso den e ” (mejoría) di nan temponan personal y logrando drenta den varios final, locual ta fundamental pa nan desaroyo den e deporte.
- 13-14 aña: Den e categoria aki e peso di e medayanan a cay mas fuerte. Den e rama femenino, Jayla Stuut a conkista brons den 50 meter mariposa. Ademas, e ekipo di relevo 4×100 meter liber (Jayla, Alisha, Tilayla y Chloe) a obtene e medaya di plata. Den e rama masculino, Jayten Winterdaal a destaca cu dos medaya di brons (400 y 200m liber) y un plata (100m liber), mientras Leandro Santiesteban a bay cu dos plata (50 y 100m pecho) y un brons (200m pecho).
- 15-17 aña: E atletanan Mika, Gabriela, Luis Mario y Ayden a mustra gran resistencia drentando finalnan y bahando nan marca personal. Un mencion special ta bay pa Matthews, kende a demostra un forsa excepcional logrando medaya di plata den e competencia di 5 kilometer (open water), despues di a competi caba den pool.
Un hañaña historico den Relevo
Un di e momentonan mas impactante pa e delegacion Arubiano tabata den e categoria 13-14 aña masculino. Despues di a gana plata den e 4×100 meter liber, e mesun ekipo aki a marca historia logrando e medaya di oro den e relevo 4×200 meter liber, un resultado cu ta posiciona Aruba na e cumbre di e disciplina aki den region.
Disciplina y e caminda pa Colombia
Ismael Santiesteban a resalta e esfuerso fisico y mental cu e atletanan aki ta desplega: “E muchanan aki ta lanta 6’or di mainta, nan ta landa, lunch, descansa un ora y mey y mester bolbe piscina. Tabata cuater dia masha fuerte cu ta forma nan no solamente como atleta, sino pa bida en general.”
E exito na Carifta ta sirbi como e plataforma perfecto pa e siguiente reto grandi. E seleccion di Aruba ta preparando caba pa e Weganan Panamericanos por edad, cual lo tuma luga na Ibagué, Colombia, for di 8 pa 12 di juli proximo. Cu e nivel di disciplina y e resultadonan recien obteni, e expectativa pa e delegacion Arubiano ta keda halto.
