Minister Geoffrey Wever riba situacion di Stacion di Gasolin
Manera mi a tuma nota di e publicacion di e doñonan di gasoline stations cu nan no lo acepta pago via tarheta mas y solamente cash mi a tuma contacto inmediato cu Aruba Gas Dealers Association (“AGDA”) y tambe cu Aruba Banker’s Association (“ABA”) pa purba intermedia y wak con por yuda na yega na un solucion.
Dialuna mainta mi a reuni cu AGDA y cu ABA pa scucha nan posicion. Mi a puntra ABA pa temporalmente suspende nan decision pa cobra e fees pa un periodo di 3 luna pa asina Gobierno haya tempo pa busca un solucion husto den beneficio di economia Arubiano sin perhudica e situacion financiero di e empresarionan, cual ta opera bou di margin di ganashi stipula pa ley.
ABA a informami cu nan ta compronde e peticion di Gobierno y cu nan ta suspende nan decision te cu 1 october proximo pa cobra e fees pa asina Gobierno haya tempo pa por intermedia y traha riba un solucion. Mirando e posicion aki di ABA, AGDA tambe a informami cu nan ta suspende nan decision te cu 1 oktober, pues pa awor tur consumidor por keda paga cu tarheta di debito of credito na cualkier gasoline station.
Mi ta gradici tanto ABA como AGDA pa coopera cu mi peticion. E dianan nos dilanti nos lo investiga con por yega na un areglo husto, den beneficio di economia di Aruba y tur consumidor.