American University School Of Medicine Aruba (AUSOMA) tin algun tempo estableci caba na Aruba. Sin embargo prome cu nan a logra esey, a pasa den hopi obstáculo. Esaki ta loke cu Kanaan Baroud a conta den un declaración duna.
Nan a cuminsa e proceso pa haya e permisonan necesario pa establece prome na Aruba y ora cu esaki tabata cla (2011), a cuminsa traha riba nan e parti di infraestructura. Nan ta estableci den área di Playa y tin mas cu 100 studiante registra cu ta sigui estudio di medicina na nan facilidadnan. Debi na COVID, e estudionan te cu awo tabata di forma hybrid. Pero ya caba pa e semester di Fall cu ta cuminsa na september, e bida lo normalisa na e universidad cu lesnan presencial.
Nan ta enfrentando diferente reto y un di nan ta e falta di espacio. Esaki ta debi cu e scol a crece. Nan ta trahando awo tambe riba acreditación, cu ta algo masha importante pa e bon nomber di cualkier universidad.
T’asina cu e organización mundial di acreditación di universidadnan algún aña atrás a dicidi cu tur universidad rond mundo cu no ta acredita, no por sigui nan operación mas. E fecha pa esaki ta vence na juli, 2023.
Den transcurso di aña nan a bin ta buscando expertonan pa yuda nan yega na e parti di acreditación. E acreditación ta parti den dos fase, di cual un di nan ta e credencialnan y e otro tin di haber cu e campus (housing di e Universidad). Pa loke ta e credencial, a wordo acredita caba. Pues mita di e trabou ta cla caba. Pero awo e universidad mester di mas espacio pa nan parti di campus.
Baroud a splica cu nan no kier ta un Universidad di Medicina so pero kier contribui na e desaroyo economico di Playa. Pesey nan a dicidi pa establece den e area menciona. E studiantenan ta huur appartmentnan cu tabata bashi pa hopi tempo, nan ta come y haci compras den centro. El a enfatisa cu no kier un campus grandi cu 200 camber y tuma tur e studiantenan. Solamente kier un campus pa e studiantenan di prome aña y despues ta laga nan bay den comunidad.
Aworaki for di 2018 nan ta estableci na ex edificio di El Gaucho.
El a splica cu e mes tabata di e grupo cu a cuminsa cu Xavier University na Aruba y despues a bende cu otro grupo.
Tabatin mas universidad pero un di nan no tey mas, pasobra si no por logra acreditacion, no por funciona mas.
Nan proximo paso ta pa establece Ausoma International Education Center, cu lo bay asocia su mes cu un universidad di New York. Por medio di esaki por duna un Associate Degree na Aruba pa studiantenan di Aruba. Studiantenan cu caba MAVO, EPI of HAVO, por participa den un programa asina.
E ta yuda pa uza di un forma eficiente e placa cu un studiante por haya pa sigui un estudio na universidad. Despues di e dos prome añanan na Aruba, por sigui cu e siguiente dos añanan pa Bachelor na Merca y tin placa gespaar pa uza den e tempo ey. Tin hopi hoben cu kier studia y no ta haya e chens. Di e forma aki ta haya oportunidad pa studia toch, y na Aruba e dos prome añanan.