Durante un conferencia di prensa dialuna, 16 di mei 2022, Minister di desaroyo sostenibel, Sr. Mr. Geoffrey Wever, a elabora riba e evento di Young Entrepreneur Summit (YES) San Nicolas. E YES! San Nicolas ta un encuentro cu tin 2 fecha, cual e prome lo tuma luga diahuebs binidero, 19 di mei 2022 na Principal Movie Theater.
Riba e prome dia e Digi-entrepreneur, Sr. Hans Hoornstra, lo comparti su conocemento ariba e importancia di ta digitalisa inteligentemente y kico ta habilidad cu sigur bo mester tin den siglo 21 pa ta un empresario exitoso. Sr. Hans Hoornstra ta conoci pa ta un orador inspirativo door di uza humor y anecdota cu lo hibabo sin esfuerso na evoluciona bo habilidad humano.
Minister Wever ta contento di por menciona cu e acogida pa e summit ta bayendo bon, y cu e prome fecha ta completamente “booked”. Esnan cu a registra pa dia 1 lo ser inscribi automaticamente pa e segundo dia – caminda lo conta cu un cupo mas grandi pa participante.
E segundo dia lo tin diferente workshops interactivo ariba temanan importante pa maneha un negoshi. E evento aki lo tuma luga dia 18 di juni 2022 den Santa Teresita Center di 1:00 PM pa 5:00 PM di atardi. Inscripcion pa e di dos fecha aki ainda ta posibel, y ta completamente gratis. Por haci esaki na: www.yessannicolas.com
“E dialogo ta un parti esencial di Aruba su recuperacion economico”, Minister Wever ta opina. Temanan cu lo ser cubri lo ta 1) Growth Hacking (online sales & marketing techniques), 2) Liderazgo & Maneho, 3) Comunicacion & Networking, 4) Administracion and Finansas. Pues un invitacion ta bai pa e comunidad hoben pa registra y participa.
Ta anticipa un session interesante caminda hobennan por comparti nan interes y aspiracion. E summit aki ta e inicio di esfuerzonan pa siguiente fase di desaroyo pa Aruba su economia. En particular pa San Nicolas ta importante pa transiciona pa un economia cu ta circular, inclusivo pa participacion, fuerte y resiliente, y mas cu tur; sostenibel.
