Awor e ta definitivo Logopedia den cobertura di seguro AZV

Conforme e decreto nacional cu ta establece medidanan general, di 29 di augustus 2023, y den cual ta stipula normanan tocante e derecho di asistencia logopedico, entrante 2 di september 2023 logopedia a keda concretisa den e cobertura di seguro AZV. Esaki ta un beneficio tanto pa mucha como adulto.

Esaki ta nifica cu si bo dokter di cas of specialista ta hay’e necesario e por referi bo pa tratamento cerca un logopedista. Logopedia ta e tratamento pa recupera, mehora of mantene e funcionamento di oido, bos of organonan di papia.

Adicionalmente logopedia por yuda cu e halamento di rosea y ora tin problema pa come, bebe of guli. Segun procedura bo dokter di cas of specialista (conforme esnan cu mag di prescribi logopedia) ta haci e peticion pa tratamento cerca e consehero medico di AZV. E consehero medico di AZV por aproba e peticion pa maximo 15 sesion den 1 aña di tratamento (= 1 aña di tratamento = 12 luna despues di e prome sesion) Den casonan excepcional, por duna 10 sesion mas.

Tratamento E tratamento por wordo pidi pa e siguiente casonan: deficiencia auditiva y deterioro di e funcion auditiva, trastorno di voz, trastorno di idioma, trastorno di lesamento y skirbimento, trastorno di articulacion, nasal, trastorno den e fluidez y ritmo di papia y comportacion anormalidad oral. Pa duna algun ehempel. Un persona cu tin e maleza di Parkinson y dokter di cas ta wak cu lo tin mester di ayudo di logopedia.

Of un persona cu ta cay bou di spectrum autismo. Of un persona cu a haya un atake celebral (“stroke”) y mester siña papia of guli bek. Kico no ta wordo cubri? Segun ley AZV no por duna permiso pa e tratamento si e ta; innecesariamente caro, complica of inefectivo. Tampoco por aproba tratamento pa dislexia, desaroyo di idioma relaciona cu dialecto of otro idioma y terapia di musica. Pa cuido di logopedista ta existi un aporte propio di 10% di e tarifa. E aporte propio di 10% ta wordo paga na cada sesion y directamente cerca e logopedista. Actualmente e tarifa ta 75 florin pa sesion y ta dura 30 minuut. Tempo di espera E ampliacion di AZV cu logopedista ta un proceso nobo y ta rekeri un bon organisacion. AZV hunto cu e logopedistanan ta den combersacion pa organiza esaki di e miho forma posibel. “Aki aya” e por nifica cu lo por tin un tempo di espera di algun siman of luna. Ta pidi e colaboracion y pasenshi di cada asegurado dentro di e trayecto aki.