Riba djaweps 25 di yüli Tourism Corporation Bonaire (TCB),
den kolaborashon ku Jack Tours, komo parti di nan programa di luna di yüli, a hasi un
bunita paseo den sentro di siudat ku klientenan di Kas di Mimina i Kas di Kuido, ku komo
tema “Turista riba mi isla”.
E paseo a tuma lugá den e trolley di Jack Tours, ku awor ta kompletamente pintá ku e
branding di TCB: It’s in our nature. E Bonaire Trolley a buska e hende grandinan na Kas di
Mimina i Kas di Kuido i a bai ku nan pa un paseo di un ora largu den sentro di Playa. Tabatin
un momentu ku nan a stòp un ratu pa kome algu, i despues di e paseo a hiba nan bèk na
e dos diferente ubikashonnan.
Na momentu ku nan tabata pasando banda di e edifisio di TCB, e tim di TCB a saludá e
hende grandinan. E grupo ku tabata hasiendo e paseo a kontestá, gritando “Masha
danki!”, miéntras nan tabata zuai ku nan bòrchinan di gradisimentu ku nan mes a traha.
Si bo tabata kanando den Kaya Grandi, bo por a tende nan kanta huntu ku nan músika
favorito.
Esaki tabata un tremendo oportunidat pa duna bèk na komunidat i pa honra e hendenan
ku a yuda traspasá nos tradishonnan i konservá nos patrimonio. Gustosamente TCB ke
gradisí tur hende ku ta dediká nan bida na kuido di nos hende grandinan i ku ta sòru pa
nan tambe por gosa di nan isla for di perspektiva di un turista.
