Featured Salud Bonaire

Boneiro ta alertra pa tene distansia en bista di oumento di kontagio nobo


Departamento di Salubridat Públiko ta pidi tur hende pa en bista  di e oumento di kaso di kontagio lokal nobo, nan mantené 1,5 meter di distansia i pone atenshon èkstra. Den e último dianan Boneiru tabatin seis kaso di kontagio lokal nobo. Den dos kaso di kontagio ta konosí ku e fuente ta pafó di Boneiru. E fuente di e otro kuater kasonan ta deskonosí. Esaki ta nifiká ku tin kontagio na Boneiru ku Salubridat Públiko no tin bon bista riba dje. E departamento ta tene kuenta ku den e dianan benidero e kantidat di kaso ta oumentá. Gezaghèber Edison Rijna a deklará anteriormente e luna akí, ku lo por bini ku medida mas severo si e kantidat di kaso di kontagio sigui subi.

 

Salubridat Públiko a purba pone tur persona ku tabatin kontakto ku e seis personanan infektá den karentena. Esaki tabata pa evitá ku nan por a sigui plama e vírùs.  Pero ta di  lamentá ku nan no a logra esaki ful. Algun persona infektá tabatin algun biaha hopi kontakto ku persona ku nan no por saka afó ta ken. Ta trata di personanan ku tabata den grupo grandi kaminda no a tene distansia di 1,5 meter. Esaki a pasa por ehèmpel na un fiesta òf na misa. E personanan infektá no sa presis ku ken nan tabatin kontakto. Pa e motibu akí Salubridat Públiko no por drenta den kontakto ku nan.

 

,,Den e lunanan ku a pasa nos a logra kontrolá COVID-19 bon. Nos ta preokupá ku awor nos  tin ménos kontrol komo ku tin fuente deskonosí. Nos ta hasi lo máksimo pa señalá e  kasonan di kontagio na tempu i  asina evitá ku e vírùs ta sigui plama,” asina dòkter Marian Luinstra-Passchier di Salubridat Públiko a deklará. “Pa e motibu akí nos ta pidi abitantenan i hende ku tei pa vakashon pa nan paga èkstra tinu den kambio di aña i e dianan despues. Tene 1,5 meter di distansia i kòrda ku ken bo tabatin kontakto.”

 

Luinstra-Passchier  ta hasi un yamada tambe pa hende tuma akshon mesora ku nan  tin keho ku por tin di aber ku COVID-19. ,,Ora bo tin keho, no warda wak kon esei ta desaroyá.  Yama 0800 0800 i hasi un tèst mas lihé ku ta posibel. Keda kas te ora ku bo sa si bo ta infektá òf nò.  Den kambio di aña tambe nos tei pa yuda hende ku tin keho. ”

Related posts

Premier Evelyn Wever-Croes: PROYECTONAN ‘BO ARUBA’ A WORDO TRATA DEN PARLAMENTO

EA News Author

Desde ayera tin un kaso positivo ku a bini aserka i un persona ku a rekuperá na Boneiru

EA News Author

Corte di Prome Instancia lo atende den oranan di atardi diferente caso di 28 januari 2021

EA News Author

Leave a Comment