Featured Salud Bonaire

Boneiru a drenta un par di siman kaba den un fase nobo di desaroyo rònt e vírùs di corona


Durante e rueda di prensagezaghebber Edison Rijna a splika boso kon e vírùs a plama na Boneiru den e periodo di  diesun te ku bintishete di sèptèmber. Naturalmente departamento di Salubridat Públiko tabata okupá siman pasá tambe pa investigá i monitoriá  situashon na nos isla. Awe mi ke duna boso un splikashon kòrtiku  di e desaroyonan di siman pasá.

Un di e kosnan ku ta resaltá ta ku ta parse ku tin diariamente ménos kaso di hende ku a pega ku e vírùs ku den e simannan promé. Esei ta bon notisia, pero nos mester tene kuenta ku esaki no ke men nesesariamente ku awor nos ta yegando na fin. Resultado di e tèstnan di ayera ta prueba esei.  Bo por wak ku awe nos a haña sinku resultado so i kuater di nan ta positivo. Esaki ta pasobra  djadumingu nos no tabatin drive thru pa test, pero  laboratorio tabatin un par di resultado di e dianan  anterior. Ta mas importante pa nos fiha nos bista riba kon e desaroyo ta bai na lugá di wak e  kantidat espesífiko di kaso pa dia. Nos ta ripará sí ku e promedio di kaso positivo  pa dia a baha ku un promedio di dos pa dia. Nos ta spera ku esaki ta sigui asina. Pero di otro un banda ta asina ku nos ta tèst konsiderablemente ménos. Den e siguiente grafik por mira kuantu resultado di tèst tabatin entre diesnuebe di sèptèmber i seis di òktober diariamente.

Nos por mira klaramente ku siman pasá tabatin  pa dia konsiderablemente ménos hende ku a laga tèst nan mes pa dia ku den e periodo anterior. Dos siman pasá un promedio di mas o ménos ochenta hende a laga tèst nan mes pa dia.  Awor tin pa dia trinta pa kuarenta hende ta mèldu pa  laga tèst nan mes, i e último diananmas o ménos bienti pa dia.

 

Naturalmente por tin diferente motibu pa esaki. Por ta asina ku ménos hende tin keho ku tin di aber ku COVID-19. Den e kaso ei esei ta positivo, esei lo por nifiká ku en bèrdat nos tin ménos kaso di hende ku a pega ku e vírùs na Boneiru. Pero por ta tambe, ku tin ménos hende ku ke pa nan tèst nan, pa ki motibu ku ta. Si esei ta e kaso, esei ke men ku nos no tin un bon bista di tur kaso di hende ku a pega ku e vírùs. Ta p’esei mi ke enkurashá bo un biaha mas : Bo tin keho? Laga nan tèst bo por fabor.

 

Kisas  bo ta pensa, ai, ta djis un fèrkout mi tin, ta un dia so mi tin ku doló  di garganta. Laga nan tèst bo tòg, pa nos por ta sigur ku bo no tin COVID-19.  Òf kisas bo ta haña ku tèstmentu ta algu eksitante Pa e hendenan akí gustosamente lo mi ke splika maneho di tèst kòrtiku. .

 

Bo ta yama 0800 – 0800 i ta bisa ta ki keho bo tin. E ora ei nan ta hasi bo par di pregunta na telefòn. Moda ku departamento di Salubridat Públiko por monitoriá situashon na nos isla bon. E ora ei na telefòn bo ta traha un sita pa tèst, mayoria biaha e sita ta pa e siguiente dia mainta. Dia di e sita bo ta bai ku outo na e e lugá di tèst riba tereno di Salubridat Públiko, banda di stadion di Playa.  Bisti un tapaboka ora di bai tèst i bai ku lensu di papel. Na e lugá di tèst nan ta splika bo kon ta hasi e tèst. Esaki ta dura par di minüt.

 

Despues di e tèst bo ta bai stret bo kas. Bo no ta pasa na supermerkado, pero bo ta bai un pasá kas.  Despues bo ta keda kas te ora ku nan yama bo na kas ku e resultado. Esaki ta dura  por lo general tres dia, tin biaha ménos. Si resultado di bo tèst ta negativo, bo tin mag di subi kaya atrobe i hasi loke normalmente bo sa hasi.  Pero paga tinu:  Si bo ta den karentena, e ora ei bo mester warda te fin di karentena. Mi ta duna mas detaye di esaki aweró.  Si resultado di bo tèst ta positivo, un kolaboradó di Salubridat Públiko ta duna  bo mas instrukshon na telefòn. E ora ei nos ta wak huntu ku ken bo tabatin kontakto i kuantu tempu bo mester keda kas.

 

Mi ke splika bo tambe tokante  kon kos ta bai ora di karentena. Parse ku no tur hende sa kon esei ta bai. Karentena ta un periodo ku un hende ku ta salú ta isolá su mes despues ku e tabatin kontakto intensivo ku un hende ku a pega ku e vírùs. Ke men si un hende tabata na un distansia di ménos ku  un meter i mei di un persona ku a pega ku e vírùs di corona,  e persona ei mester keda kas. Mayoria biaha ta trata hende ku ta biba den mesun kas ku e persona ku a pega ku e vírùs, ke men hende grandi i mucha. Pa evitá ku e persona ei ta pega otro hende ku COVID-19 sin ku e sa ku e tin e malesa, e persona akí mester keda kas te ora  ku durante dieskuater dia e no tabatin kontakto mas ku un hende ku tabatin COVID-19.

 

Ora nos yama un hende pa bisa ku e mester bai den karentena, nos ta wak kon largu e mester keda den karentena. Tin biaha esei ta pa par di dia, komo ku ta trata un kontakto di kasi dieskuater dia pasá.  Den algun kaso mester keda mas ku dieskuater dia den karentena.  Esei por ta por ehèmpel si e hende ainda tin kontakto ku un persona ku tin COVID-19, komo ku nan ta biba den mesun kas. Nos ta purba evitá esaki, pero esei no ta logra tur ora. Ke men en prinsipio karentena ta dura pues dieskuater dia, pero tin biaha e por ta mas òf ménos dia. Nos ta wak esei masha presis serka tur hende, pa nos tur por keda seif, i pa nos no tin nodi di laga hende keda kas sin ku ta na nodi.

 

Si durante karentena tin  keho ku ta surgi, e persona por laga  nan tèst e meskos ku tur hende. Ke men ku tèstmentu ta algu ku ta para lòs di karentena,  pero por tèst un hende tambe siendo ku e ta den karentena. Si bo ta den karentena i bo ta laga nan tèst bo, i e resultado ta negativo, bo mester keda  kas tambe sobrá di e tempu di karentena. Resumiendo por nota ku e kantidat resultado di tèst positivo a baha siman pasá, esaki no opstante ku ayera tabatin hopi kaso nobo di hende ku a pega ku e vírùs.  Esaki ta un señal positivo, pero nos no a yega ainda. Manera kos ta pinta nos ta kere ku e vírùs di corona ta keda un tempu mas serka serka nos.  Ta solamente si tur hende ku tin keho laga tèst nan mes, nos por haña un bista kla di e forma ku brote di e vírùs ta desaroyá na Boneiru. Sigui tene bo mes na reglanan di higiena i regla kon bo mester komportá bo mes. I si bo mester bai den karentena, tene bo mes na e reglanan di esei pa protehé bo mes i otro hende. Ta solamente huntu nos ta logra kombatí corona.

Related posts

Cada un di nos ta responsabel pa nos salud y actonan

EA News Author

Parlamentario Benny Sevinger: Gobierno y parlamento no tin unidad

EA News Author

AZV ta lamenta postura di HAVA

EA News Author

Leave a Comment