Directora di Biblioteca Nacional Aruba, sra. Astrid Britten a ricibi 5 ehemplar di ebuki di mucha for di sra. Esmeralda Tromp-Jacobs (Tanchi Esme) titula ‘Buchi Penchi Malo’. Tanchi Esme ta conoci pa su programa di radio ‘Mundo Infantil y contamento di storia’. sra. Esmeralda Tromp-Jacobs pa hopi aña ta stimula lesamento como Biebmoeder na Scol Ora Ubao. ‘Buchi Penchi Malo’ ta un buk’i mucha ilustra pa artista visual, Armando Goedgedrag. Diseño grafico ta di Timothy Lampe.
‘Buchi Penchi Malo’ ta un fabula cu ta trata importancia di evita di pensa y haci maldad, e importancia di scohe pa pone meta pa logra algo den bida. E storia tin varios mensahe. Entre otro e importancia di solo pa humanidad, siña pordona, mustra afeccion y dicidi pa scohe e bon caminda. Un storia cu Tanchi Esme tabatin warda pa hopi aña y porfin a publica esaki den forma di un bunita buki, hopi atractivo y colorido. Muchanan por fia e buki aki pronto na biblioteca publico na Playa y San Nicolas.
Request Publishing a publica e buki nobo aki ‘Buchi Penchi Malo‘ na Papiamento. Request Publishing ta di sra. Denise de Jongh-Rekwest, autora di buki pa mucha na Boneiro cu varios publicacion conoci. E buki ta obtenibel na Boneiro y Corsou tambe. ISBN 978 99904-5-290-7