Caya Grandi di Oranjestad, cu den pasado tabata e curason palpitante di nos isla y un punto di encuentro tanto pa adultonan como pa muchanan di scol, awe ta enfrenta un crisis di identidad profundo. E transformacion cu a tuma luga a resulta den un contraste marcante cu e esencia di Aruba, unda e introduccion di elementonan aheno manera palmanan cu no ta nativo, sistema di klinker cu no ta parti di nos tradicion di caminda, y un sistema di tram cu no ta refleha e cultura Arubiano a destrui e dinamica natural di nos centro di ciudad.
Un fantasia contra e realidad cultural E decisionnan tuma den pasado, bao di maneho di e gobierno di AVP, a keda marca como un “fantasia” cu no ta cuadra cu e curason di e pueblo. E esfuerso pa impone un estetica foraneo a resulta den un golpi severo pa e comerciantenan local y a kibra e vinculo cultural cu e caya tabata representa. E pregunta cu ta resona den nos sociedad awe ta kende realmente a beneficia economicamente di e proceso di renobacion aki ?, considerando cu e resultadonan ta sigui mustra cu e vision aki no ta forma parti di e identidad di e Arubiano.
E fracaso di e esfuersonan di revitalisacion Durante añanan, hopi esfuerso a wordo haci pa trece bida bek den Caya Grandi:
• Diferente organisacionnan turistico a purba nan maximo pa atrae bishitante, pero sin resultado.
• Comerciantenan local, pa nan mes cuenta, a inverti esfuerso y recursonan pa rescata nan negoshinan, pero nan esfuerso no a logra.
• Diferente gobiernonan tambe a purba implementa proyectonan, pero tur a keda sin e exito spera.
E señalanan aki ta indica cu e decisionnan original di pasado no tabata e escoho corecto, y cu tin un persistencia den mantene un modelo cu e comunidad Arubiano nunca a acepta como di nan.
Estabilidad economico: E rol di e local vs. e turista Un eror fundamental den e maneho actual ta e enfoke exclusivo riba e turista como e unico motor economico. Aunke e turista ta trece hopi dollers, nan bishita ta di un solo biaha (1malig), y nan no ta e base di nos stabilidad economico completo. E berdad, segun e analista, ta cu e stabilidad real ta bini di e localnan cu ta biba riba e isla. Ta e bienestar y e satisfaccion di e pueblo cu ta crea e positivismo necesario pa atrae turismo di un manera sostenibel, sin e local no tin turista.
Lamentablemente, e maneho ta sigui persisti den un direccion contrario na e boluntad di e pueblo. E persistencia aki di banda di gobierno contra e forsa di e sociedad Arubiano a crea un brecha caminda e “fantasia” di e Caya Grandi no ta biba den e curason di e Arubiano. E lucha aki ta bira un refleho di e forsa di nos sociedad, cu ta exigi un centro di ciudad cu realmente ta representa kico ta nifica ta di Aruba.