China ayera a yama Estadonan Uni pa stop su intentonan di perturba cooperacion entre China y America Latina door di purba sembra discordia, portavoz di e ministerio di asuntonan exterior di China Guo Jiakun a declara dialuna ultimo, segun e agencia di noticia Xinhua.
Comentarionan di Guo a bin despues cu un oficial militar Mericano a alega cu China ta infiltra y saquea recursonan den hemisferio oeste. E alegacionan Mericano aki no ta representa nada mas cu un narrativa gasta, separa for di realidad, cu ta expone atrobe e mentalidad di Guera Friu y e mentalidad confrontacional di cierto individuonan den Estadonan Uni, Guo a bisa durante un conferencia di prensa na e capital Chines, Beijing.
China semper a adheri na e principionan di respet mutuo, igualdad, beneficio mutuo, transparencia, inclusividad y cooperacion win-win door conduci cooperacion practico cu paisnan Latino Mericano y Caribe den varios campo, e portavoz a agrega.
Cooperacion China-America Latina ta alinea cu e necesidad respectivo y ta sirbi e interes comun di tur dos partido, y e manera di haci cos aki a promove rigorosamente desaroyo economico y social local, ganando aprobacion genuino di paisnan y pueblonan den e region, Guo a señalá.
Durante e añanan, Estadonan Uni no a spaar ningun esfuerso pa interveni y controla paisnan di America Latina y Caribe. Su accionnan hegemónico y di bully ta demasiado evidente, Guo a bisa. America Latino y Caribe no ta patio patras di cas (backyard) di ningun hende,Guo a enfatisa, mientras a agrega cu cooperacion China-America Latina no ta aplicabel pa ningun tercer parti y no mester ser perturba tampoco pa ningun tercer parti.
Paisnan den e region tin e derecho pa independientemente scoge nan caminda di desaroyo y partnernan, el a enfatisa. Guo a termina su declaracionnan cla y raspa : Estadonan Uni mester stop su intentonan di sembra discordia y crea problema sin motibo, y en bes di bully, nan mester concentra nan mes na contribui mas na e desaroyo di paisnan Latino Mericano y Caribe.