Un total di 41 participante a cuminsa cu e “BeYourOwnBoss” summer course 2022 na EPI Oranjestad y EPB San Nicolas. En total tabata tin 94 registration unda cu ambos localidad a yena completo te nan maximo cupo. Qredits hunto cu Ministerio di Asuntonan Economico, Comunicacion y Desaroyo Sostenibel kier anuncia cu ayera 32 participante a gradua y hanja nan certificado cu a wordo otorga door di Minister Geoffrey Wever.
E programa “BeYourOwnBoss” ta un curso cu e meta pa educa y prepara e cursistanan pa ta un empresario exitoso den futuro. Den pasado mas di 200 persona a finaliza e curso existosamente y a ricibi nan certificacion. E certificado aki ta uno riba nivel di MBO y ta un adicion excelente pa nan portfolio professional.
E curso aki ta ofrece e cursistanan mas conocimento di e mercadeo, con pa skirbi un plan di negoshi y plan financiero y tur e rekisitonan cu ta necesario y importante ora di habri un negoshi.
Qredits Aruba ta situa na Bilderdijkstraat 16 y ta conoci pa yuda varios comerciantenan cu financiamento pa cuminsa nan propio negoshi of expande nan negoshi. Ademas, Qredits ta yuda empresarionan cu coaching y business tools.
Qredits Aruba y Ministerio di Asuntonan Economico, Comunicacion y Desaroyo Sostenibel ta duna pabien na cada un participante y ta desea nan tur hopi exito den futuro.
Na mes momento ta informa cu registracion pa e siguiente curso, cuminsando Augustus 23, 2022 ta habri pa publico henter. Deadline pa registra ta Augustus 16, 2022.
