Comision di Actividad di Colegio Laura Wernet-Paskel ta invita henter pueblo di Aruba, specialmente e pueblo di Santa Cruz pa asisti na un bunita anochi di Pasco den forma di un Bazaar di Pasco dia 11 di december. E Bazaar di Pasco lo cuminsa di 6’or di atardi pa 9’ or di anochi na scol di Colegio Laura Wernet-Paskel.
E anochi aki nos lo tin un cushina cu yen di pasa boca, un bar no alcoholico, benta di boca dushi, mata, articulo y obra di man di Pasco. Tambe nos lo bay tin un Mercado di Purga grandi cu benta di entre otro paña, articulonan pa cas, kashi, lessenaar y hopi mas.
Durante e Bazaar di Pasco lo bay tin presentacion di gaita ‘Las Unicas’ y señora Betty Werleman lo bin deleita nos cu diferente di su cancionnan di propio composicion, especialmente e mas nobo di dje cu ta “Bati Man pa Shelo”. Vicente Ras cu su grupo Sodo y Cuero lo acompaña sra. Betty.
Tambe lo tin presentacion di Lysann Ras y di nos alumno cantante Xean Gelinah Leon.
Nos naturalmente tambe tin presentacion di un gaita cu lo ta e grupo di ‘Gaita Las Unicas’
Nos ta pidi aunke cu e ta un actividad den aire liber pa bin cu tapa boca bisti y mantene un distancia di 1.5m.
Nos ta spera di wak mayornan, yiunan, ex-alumnonan, bisiñanan y pueblo di Aruba na Colegio Laura Wernet-Paskel pa yuda haci e actividad aki uno exitoso, pa asina nos por sigui realisa proyectonan pendiente pa nos muchanan.