Featured Politica

Conseho di Minister di Reino a aproba acuerdo di condicionnan pa stop recorte di salario


Diabierna 24 di juni mainta, Conseho di Minister di Reino a aproba e condicionnan pa Aruba por yega na stop e recorte di 12.6%. Manera ya a wordo anuncia na mei ultimo, Aruba y Hulanda a yega na un acuerdo bou di cua condicionnan Aruba lo por stop e recorte. E acuerdo aki, a wordo aproba diabierna mainta pa Conseho di Minister di Reino. Aruba awo tin e lista oficial di e condicionnan cu mester cumpli cu ne. Prome Minister Evelyn Wever-Croes a duna di conoce cu ya caba Aruba ta hopi avansa den cumplimento di e condicionnan aki. 

E prome condicion ta cu e ley di Landsverordening Normering Topinkomens (LNT), e asina yama Wever-Croes Norm, mester wordo aproba pa Parlamento. Dialuna 27 di juni e LNT lo wordo trata den Parlamento. Ta di spera cu Parlamento bay di acuerdo cu esaki pa asina entrante juli proximo, tur empleado cu ta traha pa Gobierno y den fundacionnan cu ta wordo subsidia pa Gobierno, por haya e 5% bek riba nan salario. 

E di dos condicion ta cu e suma cu lo mester paga mester ta den presupuesto di pais Aruba. Prome Minister a enfatisa cu ya caba e suma a wordo presupuesta. Gobierno ta buscando e fondonan pa compensa e gastonan y tambe mester un conseho di CAFT riba e tema aki. CAFT a duna di conoce cu despues di e reunion di Conseho di Minister di Reino awe, e lo duna su conseho. Ta di spera e ora cu dentro di algun dia por haya e conseho di CAFT. 

E di tres condicion ta cu politiconan, minister y parlamentarionan, ta sigui mantene e recorte di 25% riba nan salario. Tanto Gobierno como Parlamento a bay di acuerdo cu esaki.

Un condicion tambe pa pone atencion riba dje ta cu pa Aruba stop e recorte completo, mester ta den cumplimento cu e normanan di e presupuesto. Esaki pa awo no ta relevante pero si lo ta relevante den futuro. 

“Cu e decision di Conseho di Minister awe mainta, e prome paso a wordo tuma pa Gobierno stop e recorte. Manera cu Gobierno a anuncia na varios ocasion, e plan ta pa cuminsa paga 5% na tur empleado publico y esnan di fundacionnan cu ta wordo subsidia pa Gobierno entrante juli venidero. Cu e decision di awe, esaki ta mas cerca di wordo realisa”, Prome Minister Evelyn Wever-Croes a duna di conoce.

Related posts

Personal di sentro di detenshon i korekshon kòrsou a risibí sertifikado di mèntòr

EA News Author

Wardacosta ta encontra 9 indocumentado riba boto local

EA News Author

Proseso pa saca of renoba carchi di salud (Ex carchi berde

EA News Author

Leave a Comment