Cuerpo Policial di Aruba (KPA) ta enfrentando un crisis profundo cu a hiba personal di e Departamento di Recherche (Dar) na un accion di protesta (“walkout”). Presidente di Sindicato di Polis (SPA), Lito Lacle, a declara categoricamente cu e situacion a bira insostenibel debi na un falta serio di personal, un desatencion structural di parti di mando policial y Ministerio di Husticia, y un falta di condicionnan laboral apropia.
Segun Lacle, e malcontento no ta algo nobo, sino e resultado di añanan largo di alerta cu a wordo ignora. E gota cu a yena e copi a resulta den e decision di e trahadornan di Dar pa cuminsa un walkout, cansa di topa cu “porta sera” y falta di solucionnan real.
Un bashi di 57% den personal
E problema di mas grandi cu Dar ta enfrentando na e momentonan aki ta e scarsedad di personal pa por atende e cantidad di casonan penal na Aruba. Lacle a splica cu e departamento mester tin un forsa laboral di por lo menos 51 recherchieur, pero actualmente tin apenas 22 trahado activo.
“Esaki no ta un falta di 30%, esaki ta un faya di 57% di personal cu falta,” Lacle a enfatisa.
El a agrega cu tres aña pasa tabatin vacatura habri pa trece shete (7) recherchieur extra pa reforsa e departamento, pero structuralmente un (1) persona so a wordo contrata. E falta di personal aki ta pone un presion enorme riba e trahadonan existente, kendenan ta trahando dianan largo di te hasta 16 ora pa dia, sin importa si ta dialuna, diasabra of diadomingo.
Como ehempel di e crisis aki, Lacle a menciona cu e Districto di Noord unda a registra dos asesinato recientemente tin practicamente tres (3) persona so ta traha, y awor a keda un (1) solo persona pa atende cu tur e investigacionnan. “Districto di Noord y San Nicolas practicamente ta blue dood,” e presidente di SPA a adverti.
E crisis den Cuerpo Policial tin un impacto directo riba e sistema hudicial di Aruba. Lacle a devela cu Ministerio Publico (OM) mester a cambia su maneho di investigacion pasobra KPA no tin e capacidad pa draai tur caso mas.
A traves di cartanan oficial (brandbrieven), Ministerio Publico a pone mando policial na altura cu, debi na e situacion grave aki, cierto casonan penal lo no por wordo atendi mas di e mesun manera y cu te hasta mester a cuminsa manda afdoeningsbrieven (cartanan pa cera casonan sin investigacion structural) debi na e falta di capacidad.
Sindicato SPA a mustra cu Ministerio Publico a manda un total di tres carta pa e mando policial pa busca un solucion urgente, di cual e prome dos cartanan ni un contesta a ricibi. E di tres si a haya un contesta, pero sin trece ningun solucion structural na mesa.
E protesta, cu inicialmente a cuminsa como un accion di dos ora pa asina evalua e siguiente pasonan, ta un mustra di e frustracion den henter e cuerpo, no solamente den recherche. Lacle a critica e falta di tacto y duna cara di e hefenan di e departamento, kendenan segun e, a declara na mesa cu nan no tin un solucion pa e problema y despues a duna lomba y drenta avion pa Corsou.
Fuera di e falta di personal, tin un malcontento general cu e condicionnan laboral y salarial. Lacle a duna un ehempel: “Awe, un werkster ganando 1960 florin net. Bo ta kere esey ta normal?” Hunto cu esaki, el a menciona cu tin hopi problema cu contractonan, falta di mantencion di asuntonan basico manera stoof of ijskast den e wardanan, obligando e polisnan mesun tin cu cumpra cuminda traha (kroket) pa por pasa e dia.
E situacion a afecta e parti psicologico y di salud di e recherchieurnan. “Nos tin cu pone man na curason. Dos tercera parti di nos bida nos ta pasa aki den, y nos kier wordo scucha,” Lacle a expresa, manifestando e preocupacion pa e bida y salud di e oficialnan cu ta wordo gasta pa e sobrecarga di trabou.
Un yamada na Prome Minister y Minister di Husticia
Sindicato SPA ta haci un yamada directo pa stop cu e “dinsreisjes” (viahenan di trabou) y pa tanto e Minister di Husticia como e Prome Minister asumi nan responsabilidad a base di articulo 13 di e Landsverordening Politie, cu ta stipula e encargo pa cu e fortalesa y bienestar di e cuerpo policial.
E sindicato ta spera un yamada asina leu awe mes di parti di un “corpschef” of minister pa asina benta un solucion concreto riba mesa. “Solucion mester bini awe, no ayera. Tres siman a pasa caba for di e ultimo reunionnan y no tin nada,” Lacle a conclui.
Crisis structural den Cuerpo Policial: Sindicato SPA ta lanta alerta y ta denuncia bashi grandi den departamento di Recherche (Dar)
