Un danki di kurason!
Manera ya a anunsiá algun siman pasá den medionan di prensa, mi a tuma e desishon pa no partisipá na e siguiente elekshon i a disidí di bandoná arena polítiko.
Entrante promé di desèmber 2022 mi lo bai ehersé un otro funshon i esaki tin komo konsekuensia ku promé ku e fecha ariba menshoná lo mi baha komo diputado di komunidat i kuido pa Entidat Públiko Boneiru. Tabata pa mi un gran honor di por a sirbí pueblo di Boneiru komo diputado na 2016 i atrobe fo’i 2019 te awor.
Den kuadro di e funshon nobo ku mi lo bai ehersé, nos a palabrá den Kolegio Ehekutivo ku desde awor mi ta pasa e karteranan di kultura i enseñansa na mi dos otro koleganan diputado.
Mi ta gradesido pa e konfiansa ku komunidat di Boneiru a pone den mi tantu komo polítiko komo mandatario den e periodo tras di lomba. Ta i tabata un honor pa sirbi mi pueblo! Un danki na tur e palabranan di sosten ku mi a risibí for di tur huki den Reino Hulandes riba e desishon ku mi a tuma pa retirá mi mes for di polítika i baha komo diputado. Un danki spesial na mi famia i tim ku a sostené mi dia aden dia afo den tur sentido di palabra.
Mi no ta yama ayó sino te despues ku un otro pèchi, semper sirbiendo na bienestar di mi komunidat.