I si ta nesesario sr. Presidente, esaki por keda alargá pa un periodo menshoná mas manera deskribí den lei.
Dia 23 di aprel 2019 sr. Presidente pa promé biaha mi a huramentá i mi a primintí pa kumpli i defendé nos leinan i pa representá e pueblo di Boneiru. Mi ta sumamente orguyoso ku mi por a haña e oportunidat akí sr. Presidente ku ta algu sagrado den mi konsepto. Hopi ta bisa ku mi no sa papia hopi den Konseho Insular sr. Presidente, pero no ta papia hopi ta hasi bo popular. Ta traha huntu i kuestioná otro na un manera respetabel tambe ta konta sr. Presidente i esei sigur sigur mi ta para pe.
Mi persona tambe ta pará pa transparensia sr. Presidente pero tambe pa integridat i papia e kosnan manera e mester ta. Mi ta lamentá sr. Presidente ku nèt den rekta final mi ta ripará un stankamentu den i ta parse ku prosesonan ta keda kreá pa alargá desishonnan final di Konseho Insularsr. Presidente sin esaki ta nesesario i ta stroba pueblo di haña un mihó bienestar.
Mi ta kontentu ku tòg mi por a kontribuí na vários desishonnan importante na bienestar general di e pueblo sr. Presidente i mi ta spera ku pa e aña aki sènnan no keda drumi den lachi sr. Presidente pa motibu ku Konseho Insular no ta tuma un desishon na tempu. Mi ta spera ku mi kolega Vrolijk lo sigui vigilá e aspekto akí hopi di aserka pa asina nos por kontribuí mas ainda na e desaroyo di Boneiru.
Mi no por keda sin menshoná sr. Presidente e temporada di krísis di Covid ku nos a pasa aden. E krísis akí a mustra bon kla sr. Presidente ku Boneiru ta hopi resiliente i a mara huntu pa kombatí esaki i tur hende a koperá bon ku otro sr. Presidente. Bo persona tabata e persona ku a liderá e pueblo boneriano i den mi konsepto bo persona a hasi un bon trabou i bo a duna e pueblo di Boneiru un sentido di union ku hopi tempu nos no a sinti aki na Boneiru sr. Presidente.
Sr. Presidente, hende ta proponé pero Dios ta disponé. Esei ta e kaso ku mi persona sr. Presidente ku mi tin ku dal un paso atras. Pero lo mi ta bèk mui pronto atrobe den e sala aki sr. Presidente. E trabou no a terminá ainda i tin masha hopi desaroyo positivo na kaminda i den nòmber di Dios mi ta spera ku mi ta bèk mui pronto pa asina duna un aporte positivo na e desaroyonan na kaminda.
No ta keda nada otro sr. Presidente di gradisí sr. Vrolijk pa su disposishon pa tuma e batuta over pa asina mi por rekuperá mi forsa atrobe i pone esaki na disposishon di e adelanto di mi pueblo di Boneiru tan stimá. Mi kier a gradisí mi famia, e partido MPB, mi votadornan i sostenedornan i tur ku ta kere den e lucha pa hasi Boneiru mas mihó tur dia. Danki na bo persona sr. Presidente, mi koleganan den sala i grifir i no ta resta mi nada otro di bisa:
Pronto lo Mi lo ta bèk ku Dios su poder i ku bendishon di Señor.