Un delegacion oficial di St. Eustatius ta na Philadelphia pa e apertura di “The First Salute: An Untold Story of the American Revolution”. E exposicion aki ta parti di e celebracion di e Semiquincentennial (250 aña) di Estados Unidos na e Weitzman National Museum of American Jewish History.
Gobernador di Isla, Alida Francis, ta lidera e delegacion cu ta inclui representantenan di Island Council di ambos faction, Clyde van Putten y Mercedes Lopes-Spanner; Secretario di Isla, Malvern Dijkshoorn-Lopes; Directora di Domain Social, Carol Jack; Manager di Unidad pa Cultura, Sjahairah Flemming; y representantenan di Region Deal, Raimie Richardson, Nicole Asin y Eric Hartstra.
Riba 21 di april 2026, e delegacion a asisti na un “preview” y un recorido guia di e exposicion hunto cu miembronan di e Cas di Representantenan di Pennsylvania. E bishita a brinda e oportunidad pa mira con e rol di St. Eustatius den e Revolucion Americano ta wordo presenta na un audiencia internacional.
E exposicion ta destaca e suceso di november 1776, ora cu St. Eustatius a bira e prome entidad stranhero pa reconoce formalmente e Estados Unidos. Esaki ta wordo poni den un contexto historico mas amplio di comercio mundial y e importancia strategico di Caribe durante e periodo ey. Artefactonan di St. Eustatius ta forma parti di e exposicion aki.
Gobernador Alida Francis lo duna un discurso na nomber di St. Eustatius durante e eventonan di apertura. E participacion aki ta parti di e preparacion pa e conmemoracion di Statia Day riba 16 di november 2026, marcando 250 aña desde e “First Salute”.
