Un delegacion di World Aquatics a asisti na un bishita formal cu Prome Minister di Aruba, mr. Mike Eman, y Minister di Relacionnan di Exterior, Educacion, Hubentud, Innovacion y Deporte, mr. Gerlien Croes. E bishita ta den cuadro di un aliansa strategico pa duna un impulso fuerte na desaroyo di deporte acuatico na Aruba den su totalidad.
E delegacion, bao liderazgo di Presidente Husain Al-Musallam, a expresa su compromiso pa traha hunto pa eleva Aruba na un nivel mas halto den deporte acuatico, inluyendo disciplinanan manera landamento open water, waterpolo, artistic swimming y buceo. Segun Al-Musallam, Aruba ya tin un infrastructura basico, pero e infrastructura aki ta limita te na cierto nivel y edad. Ta momento pa eleva deporte acuatico na un nivel Olimpico competitivo.
Hunto cu Gobierno di Aruba, Comite Olimpico Arubano (COA) y Aruba Aquatics, a stupila un meta: traha pa logra un presencia fuerte riba e scenario Olimpico, caminda Aruba por representa cu orguyo den varios disciplina acuatico.
Como parti di e plan strategico, World Aquatics lo intensifica su sosten na Aruba a traves di algun programa clave, incluyendo:
Educacion di landamento pa tur edad
Programanan elite pa atleta potencial
Proyecto di infrastructura pa piscina y facilidadnan nobo
Entrenamento di coachnan cu e ultimo avancenan tecnologico
Ya a tuma e prome paso cu ta e lansamento di un programa di coach training, cu e meta pa empodera coachnan local cu conocemento y hermentnan moderno, elevando asina e nivel di entrenamento nacional.
Gobierno di Aruba y World Aquatics ta compromete pa sigui traha na un cooperacion structural, uniendo forsa pa garantisa cu e talento Arubano por florece den un ambiente competitivo y sostentabel.
