Un herencia valioso
Prome Minister di Aruba, mr. Mike Eman, hunto cu Minister di Relacionnan di Reino, Educacion, Hubentud, Inovacion y Deporte, mr. Gerlien Croes, den presencia di dirigentenan di Biblioteca Nacional Aruba (BNA) y Archivo Nacional Aruba (ANA) a comparti cu gran orguyo e noticia historico cu UNESCO oficialmente e accepta e documentacionnan acumula pa BNA y ANA, relaciona cu e historia di sclavitud na Aruba, den su prestigioso registro “Memories of the World”.
Esaki ta un reconocemento internacional di gran balor pa Aruba. Prome Minister Eman a subraya e importancia cu e archivo aki ta un herencia valioso cu ta forma un parti esencial di nos identidad nacional. ANA y BNA a traha duro pa inventarisa categorisa y digitalisa tur e documentonan relevante, pa haci esakinan accesibel pa henter comunidad. E archivo aki ta completo, den ordo chronologico, bon structura y alinea cu e standardnan di UNESCO.
E historia di sclavitud, colonisacion y e lucha pa autonomia ta refleha den e documento- y relatonan. For di tempo di indjan, colonisacion, y sclavitud, hasta e lucha contra decisionnan tuma pa otro, Aruba semper a mustra un fuerte deseo pa determina su futuro y progreso. Esaki ta parti di nos DNA, nos capacidad pa sobrevivi y desaroya riba nos mes.
Prome Minister a haci referencia na e bishita recien di Secretario di Estado Hulandes, Zsolt Szabó, cu a bishita Museo Arqueologico Aruba, caminda e tambe a reconoce e balor historico di e comunidadnan indigena di Aruba y nan manera ingenioso di sobrevivi y desaroya un pueblo sostenibel.
Na final di e ceremonia, UNESCO a entrega un bandera special na Archivo Nacional Aruba, simbolisando e reconocemento mundial di e esfuerso di conserva y duna balor na nos historia. Prome Minister a gradici UNESCO pa su coordinacion, director di ANA drs. Raymond Hernandez, directora di BNA sra. Astrid Britten, y tur esnan cu a dedica hopi tempo y energia pa documenta e historia y trece bek na bida, tanto den exposicionnan como den poema, historia y cancionnan cu ta rebiba nos pasado.
Esaki ta un momento pa celebra pero tambe pa refleha y sigui traha riba un futuro cu ta honra nos pasado y e luchanan cu a trece nos te aki.