Diabierna venidero lo tin un reunion hopi importante entre e presidente Americano Donald Trump y su contrapartido Ruso Vladimir Putin. E cumbre aki lo wordo realisa na Alaska y tin como meta discuti asuntonan importante tocante e guera cu Rusia tin contra Ukrania. Estados Unidos durante e mandato di Joe Biden tabata aporta y apoya Ukrania cu armanan bélico y tambe finanzas pa e guera contra Rusia, sin embargo ora cu gobierno a cambia e situacion nobo tambe a cambia. Donald Trump a reduci substancialmente e apoyo duna na Ukrania te cu a parce completamente, lagando e paisnan Europeo atende cu e apoyo.
Ukrania a wordo invadi 3 aña pasa pa Rusia debi cu segun e Rusonan, Ukrania tabata buscando manera di pone armanan di NATO na e fronteranan Ruso-Ukraniano. Esaki segun e Rusonan lo ta un violacion di acuerdonan haci entre Ukrania y Rusia, despues cu Union Sovietica (USSR) a wordo desmantela, aparte tambe a subraya cu e armanan di NATO lo ta un menasa pa e siguridad di e territorio Ruso.
Tin 2 hecho remarcabel cu mester tene na cuenta; e prome hecho ta cu Vladimir Putin ya a wordo condena como un ‘ criminal di guera ‘ pa e corte penal internacional y mester wordo deteni door di interpol, un hecho cu a pone cu Putin no ta biaha Sali for di Rusia, pa evita su detencion. E segundo hecho remarcabel ta cu e reunion lo tuma luga na Alaska cu tabata un territorio Ruso y a wordo bendi na aña 1867 cu Estados Unidos.
Durante e reunion aki ta spera cu ambos mandatario lo hiba discusion ariba e tema di con pa para e guera Russia-Ukrania, cu tambe lo tin topiconan delicado manera ken lo keda cu cua territorio. Segun e presidente Ruso, teritorionan cu a wordo ocupa pa e Rusonan, manera Dombass, lo no wordo entrega bek y lo keda propiedadnan di e republica Ruso.