Directie Ouderenzaken (DOZ) ta encarga cu asuntonan relata na adulto mayor. Un aspecto hopi importante pa esaki ta e cuido cu un adulto mayor ta ricibi. Pa sigui mehora e cuido cu personal di casnan di cuido ta brinda na adultonan mayor, DOZ a acerca Horacio Oduber Hospital Academy (HOH Academy) pa asina conhuntamente por sigui mehora e conocemento y habilidadnan di personal di casnan di cuido. Di e forma aki DOZ ta trahando pa reenforsa y eleva e calidad di cuido pa adultonan mayor.
Durante e lunanan di juni y juli DOZ conhuntamente cu HOH Academy a
organisa un curso tocante tecnicanan pa mobilisa pashent. Fisioterapistanan di HOH a duna e curso y un total di 40 persona, cu actualmente ta trahando den un cas di cuido, a participa. Durante e lesnan a ricibi informacion valioso cu participantenan por a aplica di biaha den nan trabou.
DOZ kier duna un danki na HOH Academy pa e cooperacion ricibi durante di e organisacion di e curso. Esaki tabata e comienso di hopi mas colaboracion entre DOZ y HOH Academy pa asina conhuntamente por sigui mehora e conocemento y habilidad di esnan cu ta duna cuido na Aruba.
