Na Hulanda a tuma luga un debate politico “Politiek Cafe” e encuentro aki a tuma luga na Paleiskerk. Arubahuis a organisa e debate aki unda cu partido nan politico CDA, Groenlinks/Pvda, D66, VVD, y Christen Unie tabata presente pa comparti nan partido nan idiologia y discuti riba puntonan cu tin hobennan Arubiano y di islanan Caribe Hulandes preocupa na Hulanda. Director di Arubahuis Joselin Croes ta amplia mas riba e debate cu a tuma luga
E mandatarionan presente a contesta e preguntanan cu e studiantenan a haci tocante entre otro relacionnan di reino, inmigracion, e situacion di vivienda na Hulanda, e debe cu Aruba tin cu Hulanda y contratiemponan cu studiantenan di islanan ta wordo confronta cu ne ora nan bay studia na Hulanda.
Sra. Croes a splica cu e studiantenan tabata hopi skerpi na momento di haci pregunta tocante e debe cu Aruba tin cu Hulanda, y si tin otro forma pa por cumpli cu e pago aki.
Un otro situacion cu e studiantenan a trece na conocemento di e politiconan presente ta, cu no tin ningun studiante di Aruba cu por specialisa su mes den medicina na Hulanda aworaki.
Antes tabatin asina yama “Ministersposten”, caminda cu Aruba, Corsou y Sint Maarten tabata haya un post na un Universidad unda cu nan por a specialisa nan mes. E mandatarionan mes no tabata na altura di esaki y nan a pidi pa mandanan e informacion, pa nan por bay traha riba dje. Un otro punto positivo ta cu tur e partidonan cu tabata presente a bisa cu nan ta na fabor di un geschillenregeling cu lo elimina e deficit democratico cu tin actualmente entre e islanan cu Hulanda.
Ademas sra. Croes a bisa cu el a papia cu algun di e studiantenan y nan a bisa cu e informacion cu nan a ricibi durante e “Politiek Cafe” sigur ta yudanan den e decision cu nan mester tuma ora di bay vota dia 29 di oktober proximo.
Finalmente sra. Croes a haci apelacion na henter e comunidad Caribe Hulandes cu ta bibando na Hulanda pa bay haci uzo di e derecho di voto. Educa bo mes bon, wak kico cada partido ta para pe, wak bo normanan y bo balornan y locual cu ta importante pa bo futuro y pa e futuro di islanan tambe.
“E comunidad na Hulanda ta grandi, pues si nos uni forsa y bay vota pa un partido cu kier e mihor pa e islanan, nos lo por haci un diferencia.”
