MANA- Museo Arqueologico Nacional Aruba ta invita un y tur pa haci’e un bishita riba Dia di Betico entre 10’or di mainta pa 2 ‘or di merdia. Salanan di exposicion permanente ta habri pa publico. Arkeologo Raymundo Dijkhoff lo duna un presentacion tocante “Artefactonan di Oranjestad Antiguo” y lo tin actividad creativo pa muchanan den esfera familiar. Entrada, presentacion y e actividad pa mucha ta gratis!
Pa 11’or di mainta arkeologo Dijkhoff lo duna un presentacion enfocando riba hayazgonan na 2010, unda antes un cas di gobernador tabata situa y awor Plaza Daniel Leo ta. Esaki tabata e prome biaha cu tabata tin hayazgo arkeologico na Playa. Tambe lo duna informacion tocante hayazgonan arkeologico haci despues na entre otro Havenstraat, Royal Plaza, Arubus, Cocolishi y Fort Zoutman. Hayazgonan cu ta cubri mas cu 1000 aña di historia di Aruba, di e periodo Indjan y e periodo Europeo di e ultimo 300 aña. Lo elabora riba e uzo di Playa den Prehistoria y e periodo despues di 1700, incluyendo e nomber di Playa y Oranjestad. Pues un presentacion interesante cu un vision diferente di Playa/ Oranjestad.
Prome y despues di e presentacion ta ofrece un pelicula educativo cortico “Un les pa Maiky” di Stichting Monumentenfonds Aruba pa muchanan den auditorio. Den hardin di museo muchanan por haci obra di man, haya un “stempel di Indjan” y mayornan por relaha cu algo di bebe. Den sala di exposicion permanente publico por mira tambe un obra di arte di Osaira Muyale y un spiel antiguo cu tabata pertenece na famia Ecury.
Bini uno, bini tur pa disfruta gratuitamente di experencianan ameno na MANA, cu e oportundidad pa siña algo nobo y interesante di nos herencia cultural.
MANA ta ubica na Schelpstraat 42, den e compleho Ecury consistiendo di edificionan monumental y moderno. Actualmente e entrada ta via e edificio di glas (na banda) pa motibo di trabounan di mantencion y restauracion cu ta andando.
