Un di e palabracionan den cuadro di ayudo financiero (landspakket) entre aruba y hulanda ta pa haci un doorlichting di nos sistema di enseñansa. Ministerio di educacion, ciencia y desaroyo sostenibel a bay di acuerdo cu e palabracion aki y tambe ta dunando full cooperacion pa logra un resultado cu lo tin beneficio pa sigui desaroya, fortifica y mas cu claro tambe innova e sistema di educacion di aruba.
Motibo pa inclui un palabracion encuanto enseñansa den landspakket
E importancia di educacion na un nivel adecua ta un meta comun di aruba y hulanda. Den e landspakket ta indica cu tin indicacion cu tin varios faceta di enseñansa na aruba cu no ta cana bon. Ta wordo menciona entre otro: Nivel di maneho di scolnan cu no ta consistente, un falta di coxcion entre sector laboral y enseñansa, falta di metodonan di educacion moderno y tiki espacio den e presupuesto pa haci reformanan y/of innovacion posibel.
Metanan a largo plaso di e doorlichting:
- Pa realisa un nivel adecua (basiskwaliteit)di educacion na aruba;
- Pa realisa un conexion solido entre e sector priva/laboral y e sistema di educacion;
- Pa percura cu lo por sigui enseñansa avansa den diferente sistema di educacion (entre otro na hulanda)
Instrumento
E instrumento cu lo wordo usa pa e doorlichting ta un investigacion riba nivel macro di nos sistema di enseñansa. A wordo palabra cu e investigacion lo concentra riba e sistema di maneho den enseñansa ‘governance’ y tambe riba calidad di e sistema. E investigacion lo mester start na maart 2021.
Cua instancianan ta wordo investiga?
Como cu ta un investigacion riba nivel macro e ta inclui tur stakeholders cu ta parti di e sistema di enseñansa. Den e prome fase di investigacion lo concentra primeramente riba investigacionan existente y di cua e resultadonan a wordo valida pa expertonan na aruba. Aki ta referi na investigacionan di entre otro e temanan manera: Proceso di subsidio, contenido di maneho, control y supervision, idioma den enseñansa, resultado di studiantenan na aruba y den exterior, y tambe calidad di enseñansa en general.
Ken ta haci e investigacion ?
E team cu lo ta encarga cu investigacion lo ta, segun palabracionnan, un team cu tin persona di aruba y otro paisnan den reino como miembro.
Kico ta spera di e resultadonan ?
E resultadonan mester duna bista riba e direccion cu nos enseñansa mester bay den e proximo decadanan teniendo cuenta cu loke ta sostenibel y financiabel dor di pais aruba. E impacto di e sistema di eseñansa riba nos sociedad no por wordo mira di biaha, pesey ta papia di inversion den enseñansa. Pa e motibo aki mes no por prepara hobenan pa loke nos conoce awor como sociedad pero pa loke e sociedad lo bira den futuro.
