Durante tratamento di e Landsverordening Algemeen Investerings- en Ontwikkelingsfonds, conoci como Lv AIOF, Parlamentario Ing. Carlos A. Bermudez a entrega un mocion den cual e ta pidi Gabinete AVP-FUTURO pa pone atencion urgente na e situacion di e brug di Rooi Afo.
Segun Bermudez, e brug aki tin un importancia grandi pa mobilidad di ciudadanonan den e zona di Rooi Afo, Paradera y Sero Preto, pero tambe pa hopi otro usuario cu diariamente ta haci uzo di e ruta aki. E brug ta keda den un area caminda tin varios negoshi, loke ta nifica cu su ciere tin un impacto no solamente riba trafico, pero tambe riba e situacion social y economico den e vecindario.
A cera e brug di Rooi Afo dia 11 di februari 2025, bou di e gabinete anterior. Desde e momento ey, e ciere a causa hopi inconveniencia y frustracion pa residente, automobilista y negoshinan den e area.
Parlamentario Bermudez a acerca Minister di Infrastructura y tambe Departamento di Obranan Publico, DOW, pa haya un bista mas cla di e situacion actual di e brug, e trabounan necesario y e suma cu lo ta necesario pa por yega na un solucion concreto.
Segun informacion ricibi, DOW ya a haci algun estudio relaciona cu e brug y actualmente tin diseño y indicacion di e trabounan necesario. Na e momento aki, DOW ta trahando riba un projectdossier cu mester entrega na e comision di evaluacion, conforme e procedimento cu ley ta prescribi. Si e projectdossier haya un evaluacion positivo, Conseho di Minister por duna luz berde pa e trabounan por cuminsa, cu meta final pa habri e brug bek pa uzo publico.
Bermudez ta pidi Gabinete AVP-FUTURO pa evalua e posibilidad di aloca placa pa por yega na un solucion ainda den 2026. Si esaki no ta posibel, e parlamentario ta pidi pa brug di Rooi Afo haya prioridad den 2027.
“Mi ta compronde e dolor y frustracion di esunnan cu normalmente ta haci uzo di e brug aki. Pero na mes momento mi ta pidi comunidad pa mantene pasenshi, mientras nos ta sigui traha paso pa paso pa yega na un solucion,” Bermudez a expresa.
Parlamentario Bermudez ta reafirma su compromiso pa sigui e caso aki di cerca y traha hunto cu instancia concerni pa yega na un solucion pa residentenan den e vecindario di Rooi Afo y pa tur otro usuario di e ruta aki.
“Paso pa paso, cu pasenshi, positivismo, determinacion y boluntad, nos lo yega na un solucion,” Bermudez a conclui.
