Jonathan Cranston MSc, un spesialista den entrenamentu pa e depertamentu di Seguridat di Kuminda i Laboratorio di Media Ambiente di BONLAB, a kompletá un stazje na Wageningen Food Safety Research (WFSR) na Hulanda den mei 2025. E eksperensia aki a ofresé e oportunidat úniko pa risibí konosementu i eksperensia den vários departamentu di WFSR, inkluyendo mikrobiologia klásiko, análisis molekular i análisis kímiko
E meta di e stazje aki tabata pa familiarisá su mes ku e prosesonan interno, metódonan di análisis i normanan di kalidat ku WFSR ta usa. Resientemente, BONLAB a habri un departamentu spesialisá pa seguridat di kuminda i ta aktualmente den un fase di implementashon i lansamentu di e prosesonan asosiá i sistema di garantia di kalidat. Ku e desaroyo aki, e laboratorio ta tuma pasonan importante pa fortalesé su ekspertisio i servisio riba e tereno di seguridat di kuminda.
WFSR ta e laboratorio nashonal di referensia pa siguridat di kuminda na Hulanda i ta hasi análisis na nòmber di Gobièrnu Hulandes. E instituto ta hunga un ròl sentral tantu den monitoreo regular di seguridat di kuminda segun regulashonnan Oropeo komo den situashonnan di krísis. Un ehèmpel resien di esaki ta e brote di hepatitis A ku a surgi via ‘blueberry’ kontaminá ku e supermerkado Albert Heijn tabata bende. WFSR a wòrdu desplegá den e kaso aki pa determiná e kousa lihé ku eksaktitut i prevení ku e kontaminashon ta plama mas.
Importansia pa Boneiru
Boneiru a krese rápido, tantu na populashon komo den turismo, i esaki ta trese ku e demanda ta mas grandi pa kuminda. Na mes momentu, e preisnan ta subi, kual ta forsa importadónan pa buska kuminda for di diferente pais pa por sigui ofresé produkto ku ta pagabel. Pero esaki ta trese riesgo den e área di seguridat di kuminda. Aktualemente, Boneiru aún no tin regulashon obligatorio ni proseduranan standarisá pa hasi tèst riba produktonan di kuminda (importá).
Na Oropa, kuminda importá ta wòrdu kontrolá estrikto segun regulashon di EU. Na Hulanda, Rotterdam ta sirbi komo un haf prinsipal di importashon kaminda e produktonan ta wòrdu inspektá promé ku nan wòrdu distribuí den Oropa. Si tuma e prátika aki komo ehèmpel, Boneiru por traha riba un kadena di kuminda ku ta mas sigur i konfiabel.
BONLAB komo katalisadó
BONLAB ta traha aktivamente pa logra un mesun tipo di struktura pa Boneiru. No solamente dor di engrandesé konosementu na institutonan manera WFSR, pero tambe dor di bai den diálogo ku produktornan di kuminda lokal. E meta ta pa konhuntamente eksplorá e posibilidatnan pa hasi análisinan di produkto ku por kontribuí na kalidat mas haltu i seguridat di kuminda riba e isla.
Un yamada na produktornan lokal
Bo ta un produktor lokal di kuminda na Boneiru i bo ke sa kon análisinan di kuminda por yuda mehora e kalidat i konfiabilidat di bo produkto? No duda pa tuma kontakto ku nos via foodsafety@bonairelab.org. BONLAB ta dispuesto pa pensa huntu ku bo tokante e posibilidat i benefisionan di un esfuerso komun pa seguridat di kuminda riba Boneiru.
