Dia 23 di november ultimo e artista contemporaneo Osaira Muyale y Museo Arqueologico Nacional Aruba (MANA) a firma un acuerdo pa tempo indefini pa e obra menciona ariba ser exponi den e Museo. Osaira ta tambe e creador/autor di e mahestuoso cabaynan blauw den centro di Playa.
E cabay drumi abou, parti den dos, di cua uno tin e escudo di Aruba y e otro e escudo di Hulanda, ta hala nos atencion na diferente ruptura cultural cu a tuma luga den e proceso di colonisacion.
E ruta triangular di comercio di siglo 16 pa siglo 18 entre Europa, Africa y Merca (especialmente Caribe) a forma un empresa economico. Na mes momento esaki a interferi y kibra e manera di bida y cultura di e hendenan envolvi cu desplazamento y esclavisacion. Sinembargo, ta atraves di e division- y reconexionnan aki cu identidadnan nobo y cultura di awe a keda forma.
Ainda nos tin di haber cu e consecuencianan di colonisacion, y e obra di Osaira Muyale ta accentua e aspecto hibrido di e lugarnan antes colonisa. Na mes momento e ta ilustra e desconexion cultural y e falta di comprendemento cu ta existi te dia di awe. Colonianan di antes y structuranan politico di awendia ainda ta conecta y separa pa e lama blauw inmenso.
Den su obra, e narativanan personal como un yiu di un pareha mixto (Hulandes y Rubiano), y e narativanan nacional, manera Aruba su Status Aparte den Reino Hulandes, ta ser explora y ta sclama pa dialogo. Arte como simbolo di e esfuerso di un nacion Caribense pa comprende su mesun historia y tin su propio voz.
A celebra formalisacion di combenio y cooperacion entre Osaira Muyale y MANA di un forma simbolico. Hunto a bebe koffie cola cu pan dushi y buscuchi speculaas. A explora posibilidadnan pa e artista y MANA sigui traha hunto pa medio di investigacion, educacion y arte. Un simiya mas a ser planta y ta hunto lo percura pa sigui traha na desaroyo cultural di Aruba.
