Kinsasha Thielman–van der Bliek (Raiz), ta cuestiona e manera cu Minister Geoffrey Wever, encarga cu Sector Primario ta manehando e cartera aki. E proyecto Agri-Innovation, a wordo presenta como un solucion, pero den realidad e ta bay contra di e importancia pa percura cu pueblo ta siña cultiva den propio tera. “Nos ta move for di importa cuminda, pa importa tecnologia,” Thielman–van der Bliek a expresa.
E agri-innovation park ta encera un proyecto cu sistemananan, materialnan y ekiponan cu no ta wordo produci na Aruba. Pues lo mester importa technologianan pa realisa e proyecto y lo importa e expertonan riba operacion di e sistemanan aki. Asina Aruba lo sigui depende di importacion, simplemente den un forma diferente.
Sra. Thielman-van der Bliek ta conta cu e tipo di berdura y fruta cu ta planifica pa cultiva den e Agri-Innovation Park, no ta locual usualmente nos ta come den e cushina local. Si tuma nota di e rapport PRIVA, e ta indica cu e intencion final di e proyecto ta pa tin abundancia cu por exporta. E ta duidelijk cu e enfoke ta mas riba crea entrada den e presupuesto di Aruba y no riba con pa empodera nos hendenan pa cultiva pa nan provee pa nan mes y pa no mester depende riba factornan externo pa nos alimento. E maneho di Minister Wever no ta preparando nos pueblo den caso di un crisis. E hecho cu Aruba ta hopi vulnerable na factornan externo y cu e no ta tuma hopi pa desbalansa nos economia y stabilidad no por wordo no por sigui wordo ignora.
Fondo di Hulanda
Ta lamenta di mira cu fondo ta bay wordo inverti aworaki den e Agri-Innovation Park, mientras cu agricultornan tradicional no ta ricibi ayudo debido pa por sigui promove cultivo di alimento. Sra. Thielman-van der Bliek ta conta cu tin varios reto cu simplemento no ta wordo atende cu ne, manera huurgrond otorga den pasado sin tene cuenta cu e tipo di tereno y si e ta adecua of no. Tin personanan cu a hereda huurgrond pero cu ya no ta cultiva riba esakinan mas pa motibo cu e terenonan ta hopi grandi. Un otro factor ta e renobacion di bukinan di huurgrond. E maneho ta pega ya pa 5 aña caba, consecuentemente tin persona cu no ta cultivando e tereno pasobra nan ta wardando pa wak si nan ta keda cu e tereno pa despues nan por haci inversion. “Pues e Minister por a pensa riba diferente manera con pa sostene y empodera e cultivador local cu locual nan mester di dje, prome cu bin cu proyeto nobo”
Sra. Thielman-van der Bliek a sigui bisa cu si Minister Wever su intencion tabata pa yena e necesidad di alimento y yena e demanda local di cultivonan local. E lo mester a busca desaroyonan local andando, y inverti y empodera den e espacionan ey. Enbes di introduci un proyecto nobo cu ta hala tur e cultivadornan local un banda.
Locual cu tambe ta lanta hopi pregunta ta e hecho cu ta opta pa saca e maneho for di man di Santa Rosa. Un departamento cu pa hopi aña ta haciendo esfuerso pa mehora y reforma e departemento, pa motibo cu gobiernonan no a inverti den dje manera mester ta. Pa colmo kier tuma 100 mil meter cuadra di tereno for di Santa Rosa y pone un Hulandes na cabes pa maneha e proyecto. “Tambe a wordo bisa cu si e cultivado local no bay haci uzo di e greenhouse nan aki, nan lo trece inversionistanan di afo pa cultiva den e sistemanan aki.” Pues enbes di cu e Minister cuida e cultivador local, e ta bisa cu lo trece competencia pa cultivadornan local.
Esaki ta un abuso pasobra pa añanan largo, cultivadornan local a traha y soda trahando cu e tera, y pa awo nan wordo bisa: bo tincu cambia bo forma di traha, y paga un huur, pa traha cu e Agri-Innovation Park, sra. Thielman van der Bliek a indica.