Parlamentario Endy Croes ta cuestiona e postura di Prome Minister Mike Eman y partido AVP relaciona cu e propuesta di ley di reino HOFA.
E parlamentario a recorda cu den e añanan 1947 y 1948, partido AVP a colecta 2.147 firma di e ciudadanonan di e tempo ey pa proclama e separacion di Aruba, nombernan cu awe ta keda graba na e busto di Shon A. Eman como un simbolo historico di e lucha pa autonomia. Den e contexto aki, Croes a señala cu e decisionnan actual pa acepta e Rijkswet HOFA ta wordo percibi como un cambio di rumbo fundamental cu ta distancia e partido di e legado di Henny Eman, di Shon A. Eman y di e esfuerso di e pueblo cu a sacrifica pa logra e Status Aparte; un proceso cu, segun e parlamentario, ta posiciona e pais bek den un relacion di dependencia di ‘Ja Baas’, mientras e Prome Minister ta prepara pa baha como lider di AVP na september proximo y conclui su mandato dia 1 di januari 2027.
Analisis di e maneho financiero (2010 – 2017)
Den su evaluacion, Croes a repasa e periodo di gobernacion di Sr. Mike Eman entre 2010 pa 2017, señalando cu e maneho administrativo y financiero di e tempo ey a laga consecuencianan grave pa Aruba. El a trece e siguiente puntonan dilanti:
*Gasto di Personal: 427 coordinador, di cual 147 tabata traha directamente pa e Prome Minister.
*Proyectonan y Eventonan: E gastonan halto den e “Green Conference” y e 2 miyon florin inverti den e boto di Wubbo Ockels.
*Uzo di Fondo Publico: E entrega di 2 miyon florin via ATA pa un auto di careda na Merca, 4 miyon florin pa e compania di conseho Horizon y 8 miyon florin den campañanan di promocion.
*Casonan hudicial y Mega debe: E casonan di corupcion cu a envolvi ex-ministernan di AVP, y e creacion di un debe di 2.200 miyon florin den 8 aña sin cu tabatin un pandemia.
*Intervencion y Supervision Financiero: E intervencion di Hulanda na 2014 pa un deficit presupuestario di 443 miyon florin, lo cual a hiba na introduccion di LAFT y CAFT na 2015.
Croes a enfatisa cu e pueblo di Aruba awe ta esun cu mester sigui carga y paga e debanan aki.
E Situacion Actual y e Proceso di HOFA
Segun e parlamentario, e intencion tras di e decisionnan actual ta pa mehora e relacion personal di e Prome Minister cu politica na Den Haag, entregando e autonomia financiero na Hulanda cu e expectativa di habri portanan pa posicionnan prominente den Reino despues di su salida di politica activo.
Croes a señala cu mientras e Prome Minister ta enfoca riba proyectonan di embeyecemento y limpiesa, e proceso di HOFA ta sigui avansa sin e transparencia necesario. E bishita di Secretario di Estado Eric van der Burg dia 15 di juli ultimo a resulta den un anuncio cu Aruba y Hulanda lo continua cu e proceso di HOFA y lo traha riba un “nadere verklaring”, a base di e consehonan di Raad van Advies y Raad van State.
Advertencia y Posicion di e Oposicion
Parlamentario Croes a haci un yamada na AVP y su partner di coalicion Futuro, señalando e rechaso cu tin contra HOFA:
*10 parlamentario, mas di 10.000 firmante, y 13 sindicato (cu ta representa mas di 15.000 trahado) a expresa nan desacuerdo.
*E tres consehonan di Profesor Elzinga ta contra e propuesta. Ademas, e rapport di evaluacion di Algemene Rekenkamer di Hulanda riba 10 aña di e Rijkswet na Corsou y Sint Maarten a conclui cu e ley aki no a yuda e crecemento socio-economico, sino cu a stanca e desaroyo di e islanan aki.
Croes a conclui bisando cu no por ta asina cu, apesar di tur e advertencianan aki, ta opta pa sigui pusha HOFA den silencio den reces “mescos” cu aña pasa. Recordando e dicho cu “macaco ta hunga cu e rabo te ora e saca su wowo.” Spierta!