E reunion cu a cuminsa dialuna mainta 9:00 am y a caba diamars madruga 3:00 am, a duna un demostracion cla di compromiso, transparencia y liderazgo den nos pais. Cu cuater presupuesto importante riba mesa: Raad van Advies (RvA), Ombudsman, Algemene Rekenkamer y Parlamento di Aruba, e reunion maratonico aki no tabata simplemente un proceso tecnico, sino un acto di fortaleza democratico. Como fraccion di PPA, Eduard Pieters tin speransa cu pronto Parlamento lo por dal paso positivo y responsabel relaciona cu nan funcionamento como parlamentario.
RvA: Reforzando control y asesoramento independiente
Un di e logronan mas significativo ta e decision pa aloca fondo pa un begrotingskamer den Raad van Advies. E fraccion di PPA tabata un di e promotor principal pa idea aki, precisamente pa fortalece e control riba gasto publico y pa duna Parlamento un base tecnico y experto. Un begrotingskamer independiente ta fundamental pa un pais chikito manera Aruba regla den leynan local, pa garantisa cu e decisionnan di gobierno ta basa riba analisis profundo y no riba preferencia politico. Segun Eduard: “E paso aki ta mustra cu nos mes por y nos ta move firme den direccion di transparencia y bon gobernacion. Esaki ta pone Parlamento den un mihor posicion, pa haci su trabou “debido y transparente” y no depende di un organo Hulandes.
Ombudsman: Preparando tereno pa un ‘Kinderombudsman’
E presupuesto di Ombudsman tambe a ricibi e debido atencion. “Nos por compronde cu pa e aña siguiente, lo por inicia cu un kinderombudsman. Esaki sigur ta un logro cu ta representa un paso grandi y importante den proteccion di derecho di mucha na Aruba. Den un pais caminda bienestar di mucha mester ta sagrado, e introduccion di un instancia cu ta defende, specificamente nan bos, ta un desaroyo sumamente importante,” Eduard a vocifera.
Institucionnan independiente: Pilar di nos democracia
“Si nos mira nos constitucion, nos ta papia di e organonan mas halto, cu ta protega nos democracia y ta controla otro poder publico. E reunion maratonico di awe ta confirma un bes mas, cu nos sistema democratico ta bibo y reforzando su mes. Control, transparencia y evaluacion critico ta fundamental pa un gobernacion solido.
Parlamento di Aruba: Tuma responsabilidad y mira den futuro
“Durante e discusion di presupuesto di Parlamento, como lider di fraccion y miembro di CHA, nos a trece nos puntonan dilanti tocante operacion y funcionamento actual di Parlamento. Nos a identifica, unda nos ta haci bon y unda nos por mehora”, Eduard a sigui elabora. Segun Pieters, tin hopi trabou pa haci y cu e comision competente mester wordo activa y pone man na obra den e aña cu ta bin. “Un Parlamento efectivo ta base di un pais fuerte y esaki ta un responsabilidad cu nos ta tuma serio como partido.”
E reunion maratonico no tabata simplemente un evaluacion di presupuesto, sino un afirmacion di nos compromiso como pueblo y como lider politico. Nos democracia ta bibo, nos control ta fortaleci y nos prome paso pa futuro ta na bon caminda. Aruba merece un sistema cu ta transparente, responsabel y orienta riba bienestar di su ciudadano y awe nos ta dal un paso mas firme den e direccion aki.
Press release: PPA