E reunion di siman pasa tocante Rijkswet HOFA a mustra un biaha mas un gobierno cu ta falta respet pa e proceso democratico y ta trata e pueblo Arubiano manera cu nan no sa nada. Segun Eduard Pieters, e reunion tabata mesun cu di 29 di augustus, unda Otmar Oduber tabata presente y a indica cu e procedimento palabra no a wordo sigui. Pieters a bisa: “Mi a pidi un punto di ordo, pero e presidente di Parlamento no a duna mi ni bos ni oido. Nan no kier transparencia, nan kier control.”
Ta Cuestion di E Proceso
Gobierno y Minister Wever ta purba desvia atencion di pueblo, pretendiendo cu e reunion tabata pa trata “contenido di Rijkswet” y cu niun hende a haci pregunta. Pero segun Eduard Pieters, e meta di e reunion no tabata contenido, sino e proceso. E ta lamenta cu Minister Wever ta bisa cu “Aruba no ta perde su autonomia” y cu oposicion “no sa di kico ta papia.” Pieters a contesta: “Con bo por bisa asina, si segun articulo 38 di e Rijkswet, e ultimo palabra ta den man di un Conseho di Reino Hulandes? Esey ta un echo legal.” El a enfatisa: “Fraccion di PPA ta defende claridad, respet y democracia, no manipulacion ni didactura.
Articulo 38: E golpi contra nos autodeterminacion
“Tur experto di ley ta cla riba esey: e articulo 38 di e concepto di HOFA ta limita nos autodeterminacion. Pues no ta cuestion cu fraccion di PPA ta compronde algo of ta pretende di ta hurista. Ta e expertonan di ley ta papiando,” Eduard a enfatisa. Pues na final di henter e dilema aki, ta e Conseho di Reino Hulandes ta dicidi y despues di nan decision, Aruba por “stel e vast”, cu otro palabra: djis sigui ordo! Anto minister Wever, fraccion di AVP y FUTURO kier bisa nos cu e pueblo no ta perde poder? Esey ta hunga cu inteligencia di pueblo. Esey mester stop!
Ken a manda e Rijkswet?
“E punto mas grave di henter e asunto aki di Rijkswet HOFA ta, cu gobierno no por mustra e opdracht formal di su propio conseho di minister, unda a manda e Rijkswet pa Hulanda. Pues
si e documento no ta existi, ken a manda e Rijkswet HOFA pa Hulanda?” Eduard ta cuestiona. Esey ta keda e pregunta fundamental cu, te awe, e gobierno no por duna niun contesta. Y sin aprobacion di Parlamento, cu ta e bos di pueblo, ningun Consensus Rijkswet no por bay pa Hulanda.
Respeta e pueblo y e proceso
Finalmente fraccion di PPA a expresa cu nan no ta contra di progreso ni transparencia fiscal. Loke nan ta contra ta e manera iresponsabel cu gobierno ta viola nos proceso democratico y ta entrega nos autonomia sin permiso di Parlamento. Un gobierno cu ta ignora procedimento, ta ignora su pueblo. Nos no ta pidi algo imposibel! Nos ta pidi respet, claridad y integridad. Ta basta cu hunga cu pueblo. Aruba merece un gobierno cu ta sirbi cu dignidad, no cu manipulacion. Nos autodeterminacion no ta un fabor; ta un derecho cu nos a lucha pa haya y nos lo sigui defende, cu berdad y cu curashi.
Press release: PPA